తెలంగాణ రాష్ట్రంలో తొలి కరోనా బాధితుడిగా నమోదై గాంధీ ఆసుపత్రిలో చికిత్స పొందుతున్న వ్యక్తి కోలుకుంటున్నట్లు తెలిసింది. ఆసుపత్రిలోని ఐసోలేషన్ వార్డులో వైద్యుల పర్యవేక్షణలో యువకుడు చికిత్స పొందుతున్నాడు. ఐసీయూలో ఉంచి వైద్య సేవలు అందించారు. ప్రస్తుతం 32 మంది ఇన్పేషెంట్లుగా ఉన్నారని, వారిలో నెగిటివ్ రిపోర్టులు వచ్చిన వారందరినీ పంపిస్తున్నట్లు ఆసుపత్రి వర్గాలు తెలిపాయి.
కరోనా అనుమానితుడి నుంచి తాజాగా నమూనాలు సేకరించి పరీక్షలకు పంపించగా నెగిటివ్ వచ్చినట్లు వెల్లడైంది. వైద్యబృందం ప్రత్యేక చొరవ తీసుకుని వైద్యం అందించడం వల్ల క్రమంగా జ్వరం తగ్గి, బీపీ అదుపులోకి వచ్చింది.
తాజాగా ఊపిరితిత్తులకు సంబంధించిన నమూనాలు మళ్లీ సేకరించి పరీక్షలు పంపించారు. అందులోనూ నెగిటివ్ రిపోర్టు వచ్చింది. దీనిపై ఆసుపత్రివర్గాలు హర్షం వ్యక్తం చేస్తున్నాయి. మరోసారి నమూనాలను సేకరించి పుణే వైరాలజీ ల్యాబ్కు పంపించాలని నిర్ణయించారు. అక్కడ కూడా నెగిటివ్ వస్తే.. అతన్ని డిశ్చార్జ్ చేస్తారు.
ఇదీ చూడండి:
