'ఆ విషయంలో వైకాపా నేతలకు ఆస్కార్ ఇవ్వొచ్చు'

తెదేపా అధినేత చంద్రబాబు మాజీ పీఎస్‌ పెండ్యాల శ్రీనివాస్‌ నివాసంలో జరిగిన ఐటీ సోదాల్లో... వేల కోట్లు దొరికాయని వైకాపా అసత్య ప్రచారం చేస్తోందని తెదేపా నేతలు మండిపడ్డారు. అక్కడ దొరికింది కేవలం 2 లక్షల రూపాయలు మాత్రమే అని స్పష్టం చేశారు. దీనికి మరికొన్ని సున్నాలను కలిపి వైకాపా సొంత మీడియాలో అసత్య కథనాలు అల్లారని విమర్శించారు. ఐటీ శాఖ విడుదల చేసిన పంచనామా రిపోర్టు దీనికి నిదర్శనమన్నారు.

తెదేపాపై అసత్య ప్రచారం చేస్తూ వైకాపా నాయకులు దొరికిపోయారని తెదేపా ఎమ్మెల్సీ కేఈ ప్రభాకర్ దుయ్యబట్టారు. చంద్రబాబు మాజీ పీఎస్ శ్రీనివాస్ ఇంట్లో జరిగిన ఐటీ దాడుల్లో దొరికింది 2 లక్షల 63 వేల రూపాయలు అని... అది కూడా తిరిగి ఇచ్చేశారని ఆయన గుర్తుచేశారు. 2 లక్షలకు మరికొన్ని సున్నాలు కలిపి 2 వేల కోట్లు చేసి వారి సొంత మీడియాలో అసత్య కథలు అల్లారని మండిపడ్డారు. ఆఖరికి ఐటీ పంచనామాతో జగన్ అసత్య ప్రచారానికి పంచర్ పడిందని ట్వీట్ చేశారు.

ప్రకటన చేయగలరా..?

చంద్రబాబు మాజీ పీఎస్ శ్రీనివాస్​ ఇంట్లో జరిగిన ఐటీ సోదాల్లో 2 వేల కోట్లు దొరకాయంటూ వైకాపా నేతలు అసత్య ప్రచారం చేస్తున్నారని తెలుగుదేశం పార్టీ నేత తెనాలి శ్రావణ్ మండిపడ్డారు. ఐటీ తనిఖీల పంచనామా నివేదిక ఉందని ప్రకటించగలరా అని ప్రశ్నించారు. తనీఖీల్లో దొరికిన డబ్బును శ్రీనివాస్ కుమార్తె పెళ్లి కోసం సిద్ధం చేసుకున్నారని వివరించారు.

ఏం సమాధానం చెబుతారు..?

వైకాపా అబద్ధాలతో కాలం నెట్టుకొస్తోందని తెదేపా ఎమ్మెల్యే అనగాని సత్యప్రసాద్ మండిపడ్డారు. చంద్రబాబు మాజీ పీఎస్‌ శ్రీనివాసరావు ఇంట్లో దొరికింది కేవలం 2.63 లక్షలు మాత్రమేనని కానీ 2వేల కోట్లు అంటూ అసత్య ప్రచారం చేస్తున్నారని ఆగ్రహం వ్యక్తం చేశారు. దుష్ప్రచారం చేయటంలో వైకాపా నేతలకు, ఏ1, ఏ2లకు ఆస్కార్‌ అవార్డులు ఇవ్వొచ్చని ఎద్దేవా చేశారు. తమిళ సూపర్‌స్టార్‌ విజయ్‌పైనా ఐటీ దాడులు జరిగాయని, వాటిని కూడా తెదేపాకు అంటగడతారా అని ఎద్దేవా చేశారు. వైకాపా నేతలంతా ఐటీ పంచనామా నివేదికకు ఏం సమాధానం చెబుతారని ఓ ప్రకటనలో అనగాని ప్రశ్నించారు.

ఇదీ చదవండి