రూటు మార్చిన సైబర్ నేరగాళ్లు - నకిలీ ప్రభుత్వ వెబ్​సైట్లతో మోసం

సూర్యలంక బీచ్‌ రిసార్ట్స్​కి భారీగా డిమాండ్‌ - దీనిని క్యాష్ చేసుకుంటున్న సైబర్ మోసగాళ్లు

Haritha Resort Rooms Booking Fraud : సైబర్‌ నేరగాళ్లు యథేచ్ఛగా మోసాలకు పాల్పడుతున్నారు. రోజుకో తరహాలో ఎత్తులు వేస్తూ ప్రజలను ఏమార్చుతున్నారు. సైబర్​ నేరాలపై పోలీసులు ఎంత అవగాహన కల్పించినా బాధితుల సంఖ్య రోజురోజుకి పెరుగుతూనే ఉంది. ఓవైపు ఉద్యోగాలు, బహుమతులు అనే ఆశలను ఎరగా వేస్తున్నారు. మరోవైపు ప్రముఖుల సామాజిక మాధ్యమాల ఖాతాల డీపీలను ఉపయోగించి డబ్బులు డిమాండ్‌ చేస్తున్నారు. కానీ వారు ఇప్పుడు రూట్ మార్చారు. ఏకంగా తెలుగు రాష్ట్రాలకు చెందిన ప్రభుత్వ శాఖలకు సంబంధించిన వెబ్​సైట్లను పోలిన ఫేక్ వెబ్​సైట్స్​ని సృష్టిస్తున్నారు. పొరపాటున ప్రజలు వాటిని ఆశ్రయిస్తే ఖాతాలు ఖాళీ చేసి మాయమవుతున్నారు.

బాపట్లకు సమీపంలోని సూర్యలంకలోని టూరిజం డిపార్ట్​మెంట్ బీచ్‌ రిసార్ట్​కి భారీగా డిమాండ్ ఉంది. దీనిని ఆసరాగా చేసుకుని కొంతమంది సైబర్​ నేరస్థులు నకిలీ వెబ్‌సైట్‌లతో పర్యాటకులను మోసగిస్తున్నారు. తాజాగా ఓ ఘటన వెలుగులోకి వచ్చింది. హైదరాబాద్​లో పని చేస్తున్న ఓ ప్రైవేట్ ఉద్యోగి కుటుంబంతో కలిసి సెలవుల్లో సూర్యలంక బీచ్​లో గడిపేందుకు ప్లాన్ చేసుకున్నాడు. ఈ క్రమంలో ముందస్తుగా గదుల బుకింగ్ కోసం ఆన్​లైన్​లో కనిపించిన వెబ్​సైట్​ను ఆశ్రయించాడు.

హరిత బీచ్ రిసార్ట్ పేరిట వెబ్​సైట్​లో ఉన్న ఫోన్ నంబర్​కి ఆ ప్రైవేట్ ఉద్యోగి కాల్ చేశాడు. ఫోన్ ఎత్తిన సైబర్ నేరగాళ్లు రిస్టార్ట్ మేనేజర్​ సంజయ్​గుప్తాగా పరిచయం చేసుకున్నారు. గదుల బుకింగ్ కోసం నగదు బదిలీ చేయాల్సిన ఖాతా వివరాలను ఆయనకు వాట్సప్ చేశాడు. ఇక్కడే బ్యాంకింగ్ సిస్టంలో ఉన్న లోసుగులను సైబర్ నేరస్థులు అవకాశంగా మల్చుకున్నారు. సహజంగా ప్రైవేట్ బ్యాంకు ఖాతాలకు ఏ బ్రాంచ్ ఐఎఫ్​ఎస్​సీ కోడ్ ద్వారా అయినా నగదు బదిలీ చేసే అవకాశం ఉంది.

Cyber Cases in AP : వెంటనే రెండు గదుల బుకింగ్ కోసం పంపించిన ఆ నంబర్​కి బాధితుడు నగదు బదిలీ చేశాడు. ఇక్కడే సైబర్ నేరగాళ్లు మరో ఎత్తుగడకు తెర తీశారు. సొమ్ము బదిలీ కాలేదని, ఇంకోసారి చెల్లింపు చేయాలని కోరారు. పేమెంట్ సక్సెస్ అయినట్లు తనకు మెసేజ్ రావడంతో ఆయనకి అనుమానం వచ్చింది. పూర్తి వివరాలు వారిని అడగ్గా పొంతన లేని సమాధానాలు చెప్పారు. ఈ క్రమలో తాను సైబర్ మోసానికి గురైనట్లు ఆ ఉద్యోగి గ్రహించాడు.

వెంటనే తేరుకన్న బాధితుడు సైబర్ క్రైమ్ పోర్టల్​లో ఫిర్యాదుతో పాటు స్థానిక పోలీసులకు ఫిర్యాదు చేశాడు. మరోవైపు బాధితుడు నగదు బదిలీ చేసిన రోజే హైదరాబాద్​లోని ఆ బ్యాంకు శాఖకు వెళ్లి బ్యాంకు ఖాతాపై ఆరా తీయగా సంచలన విషయాలు వెలుగులోకి వచ్చాయి. సైబర్ నేరగాడు పంపించిన అకౌంట్ నంబర్ మధ్యప్రదేశ్​లోని సాగర్ జిల్లా పరిధిలోని డిరోయ్ ప్రాంతంలో ఉన్నట్లు తెలిసింది. వేర్వేరు ప్రాంతాల నుంచి ఆ ఖాతాకు పెద్ద మొత్తంలో నగదు జమయ్యాయి. అవి కూడా ఎక్కువగా రెండు తెలుగు రాష్ట్రాలలోని పర్యాటక ప్రదేశాల నుంచి కావడం గమనార్హం.

"ప్రభుత్వ వెబ్​సైట్​లోన్ గదులు బుకింగ్ చేసుకోవాలి. సైబర్ నేరగాళ్లు హరిత బీచ్ రిసార్ట్ సూర్యలంకతో పాటు మరికొన్ని పర్యాటక ప్రాంతాల పేరుతో మోసాలకు పాల్పడుతున్నారు. గతంలోనూ సైబర్ మోసాలు వెలుగులోకి వచ్చాయి. వీటి పట్ల ప్రజలు అప్రమత్తంగా ఉండాలి." - జి.అశోక్ ఏపీటీడీసీ, హరిత బీచ్ రిసార్ట్ మేనేజర్

మరోవైపు నెలరోజుల క్రితం శ్రీశైలంలోని కాటేజీల బుకింగ్​లో కూడా బాధితులు రూ.28,00లు పొగొట్టుకున్నారు. దాదాపు 5 నెలల క్రిత హరిత బీచ్ రిసార్ట్ విషయంలో 30 మంది వరకు పర్యాటకులు ఈ తరహా సైబర్ మోసాలకు గురయ్యారు. దాదాపు వారి నుంచి ఐదు లక్షల వరకు సైబర్ నేరగాళ్లు దోచేశారు. గదులు బుక్ చేసుకునే పర్యాటకులు ప్రభుత్వ వెబ్​సైట్​నే ఆశ్రయించాలని పోలీసులు సూచిస్తున్నారు. తక్కువ ధరకే రూంలు ఇస్తామంటే సందేహించాలని చెబుతున్నారు.