గ్రామాల్లో కొంతైనా అభివృద్ధి జరుగుతోందంటే కేంద్రం కేటాయిస్తున్న ఆర్థిక సంఘం, ఉపాధి హామీలో మెటీరియల్‌ నిధులతోనే! ఆర్థిక సంఘం నిధులను రాష్ట్ర ప్రభుత్వం విద్యుత్తు ఛార్జీల బకాయిల కింద మళ్లిస్తున్నందున పల్లెల్లో రెండేళ్లుగా చెప్పుకోదగ్గ అభివృద్ధి పనులు జరగడం లేదు. నరేగాలో మెటీరియల్‌ నిధులదీ అదే పరిస్థితి. వైకాపా ప్రభుత్వం వచ్చాక రూ.10 వేల కోట్ల మెటీరియల్‌ నిధులతో 36,500కి పైగా భవన నిర్మాణాలకు అనుమతులిచ్చారు. వీటిలో గ్రామ సచివాలయాలు, డిజిటల్‌ గ్రంథాలయాలు, రైతు భరోసా, ఆరోగ్య, పాలశీతలీకరణ కేంద్రాల భవనాలు ఉన్నాయి. కొత్తగా చేపట్టాల్సిన ఇతర పనులను పూర్తిగా వదిలేశారు. కేంద్రం నుంచి గతేడాది మెటీరియల్‌ నిధుల విడుదలలో జాప్యంతో భవన నిర్మాణాలకు బిల్లులు సకాలంలో చెల్లించలేకపోయారు. వివిధ దశల్లో ఉన్న వీటిని పూర్తిచేయడం అధికారులకు సవాలుగా మారింది. ప్రస్తుతానికి పెండింగ్‌ బిల్లులు చెల్లించి మిగిలిన పనులు డిసెంబరులోగా చేయించాలని అధికారులు భావిస్తున్నారు. ఈ క్రమంలో గ్రామాల్లో మెటీరియల్‌ నిధులతో కొత్త పనులు మంజూరు చేయడం లేదు. గతేడాది అరకొరగా కేటాయించినా, ఈసారి పూర్తిగా నిలిపివేశారు.
తప్పిన అంచనాలు
కేంద్రం నుంచి మెటీరియల్‌ నిధులు భారీగా రాబట్టాలన్న ప్రభుత్వ అంచనాలు ఈసారి తలకిందులయ్యాయి. ఉపాధి పనుల వ్యయంలో 2/3 వంతు నిధులను మెటీరియల్‌ కింద కేంద్రం రాష్ట్రానికి కేటాయిస్తుంది. కేంద్రం ఏటా 20 కోట్ల నుంచి 23 కోట్ల పని దినాలను రాష్ట్రానికి నిర్దేశించేది. దీంతో మెటీరియల్‌ నిధులు ఏటా రూ.8 వేల కోట్లకుపైగా వచ్చేవి. గతేడాది 23.50 కోట్లు కేటాయిస్తే అంతకుమించి 24.17 కోట్లు వినియోగించారు. ఈ ఏడాది అనూహ్యంగా 14 కోట్ల పనిదినాలే నిర్దేశించడంతో మెటీరియల్‌ నిధుల్లో భారీగా కోత పడింది. రూ.4,500 కోట్లకు మించి రాకపోవచ్చని అధికారులు చెబుతున్నారు. ఈ పరిస్థితుల్లో గ్రామాల్లో కొత్త పనులు మంజూరు చేస్తే బిల్లుల చెల్లింపు సమస్యగా మారనుంది. ‘మెటీరియల్‌’తో చేసే కొత్త పనులకు రాష్ట్ర ప్రభుత్వం నుంచి నిధులు కేటాయించే అవకాశం లేదు. దీంతో నిర్మాణంలో ఉన్న భవనాల పనులు తొలుత పూర్తిచేయాలని నిర్ణయించినట్లు పంచాయతీరాజ్‌, గ్రామీణాభివృద్ధిశాఖ అధికారి ఒకరు తెలిపారు.
ఇవీ చదవండి:
