పంచాయతీ ఎన్నికల్లో 81 శాతం స్థానాలను వైకాపా గెలిచిందని జలవనరుల శాఖ మంత్రి అనిల్ కుమార్ యాదవ్ అన్నారు. సీఎం వైఎస్ జగన్ సంక్షేమ పాలన వల్లే పంచాయతీ ఎన్నికల్లో ఈ విజయం సాధ్యమైందన్నారు. నాలుగు దఫాల్లో కలిపి కేవలం 16 శాతం పంచాయతీలను మాత్రమే తెదేపా గెలుచుకుందన్నారు.
చంద్రబాబును సొంత నియోజకవర్గం కుప్పంలోనూ ప్రజలు చీకొట్టారని మంత్రి అనిల్ కుమార్ వ్యాఖ్యానించారు. కుప్పంలో 8 వార్డులు గెలిచినందుకు సంబరాలు జరుపుకున్నారని ఎద్దేవా చేశారు. పోలీసులు దౌర్జన్యం చేస్తున్నారని చంద్రబాబు అసత్య ఆరోపణలు చేస్తున్నారన్నారు. పోలీసులు బాగా పని చేశారని ఎస్ఈసీ ప్రశంసిస్తుంటే.. చంద్రబాబు మాత్రం పోలీసులపై ఆరోపణలు చేస్తున్నారని దుయ్యబట్టారు. ఎన్నికల ఫలితాలతో చంద్రబాబు మతిస్థిమితం కోల్పోయారన్నారు.
రాజధాని అమరావతి ప్రాంతంలోని తాడికొండలోనూ 70 శాతం సర్పంచులను వైకాపా కైవసం చేసుకుందన్నారు. సీఎం వైఎస్ జగన్పై నమ్మకంతో ప్రజలు విజయాన్ని అందించారని, అందుకు ప్రతి ఒక్కరికీ ధన్యవాదాలు తెలియజేస్తున్నామన్నారు. ప్రతిపక్ష నాయకుడిగా కూడా చంద్రబాబు పనికిరారని రాష్ట్ర ప్రజలు నిర్ణయించారన్నారు. మంత్రుల వల్ల ఏదైనా లోపాలు ఉంటే సరి చేసుకుంటామన్నారు. రాబోయే ఎంపీటీసీ, జడ్పీటీసీలోనూ ఇదే ఫలితాలు పునరావృతమవుతాయన్నారు. తెదేపాకు వచ్చిన 16శాతం సీట్లు కూడా సొంతం చేసుకునేలా ముందుకు వెళ్తామన్నారు.
ఇదీ చదవండి
