Hyderabad Old Man Bike Yatra : ఈయన పేరు రమేశ్‌చంద్రబాబు. వయసు 72 ఏళ్లు. హైదరాబాద్‌ కూకట్‌పల్లి పరిధిలోని మాధవీనగర్‌ వాసి. గుత్తేదారుగా పనిచేశారు. గిన్నిస్‌బుక్‌లో చోటు సాధించడమే లక్ష్యంగా 1.70 లక్షల కి.మీ. బైక్ యాత్రను ఈ నెల 10న హైదరాబాద్‌లో ప్రారంభించారు. సోమవారం కామారెడ్డికి చేరుకున్నారు. ‘సీనియర్‌ సిటిజన్లు అద్భుతాలు చేయగలరు’ అంటూ ద్విచక్ర వాహనంపై రాయించుకొని దేశవ్యాప్త యాత్రకు శ్రీకారం చుట్టారు.
Hyderabad Old Man Bike Yatra news : ‘బెంగళూరుకు చెందిన ఓ కన్సెల్టెన్సీ రూట్‌మ్యాప్‌ తయారుచేసి ఇచ్చిందని.. రోజుకు సుమారు 250 కి.మీ. చొప్పున 700 రోజులపాటు యాత్ర సాగుతుందని.. ఆదివారాలు, పండగ రోజుల్లో విశ్రాంతి తీసుకుంటానని రమేశ్‌చంద్ర పేర్కొన్నారు. రెండేళ్ల కిందట ఈ ఆలోచన రావడంతో విశ్రాంత సైనిక అధికారి భీమయ్య వద్ద ఆర్నెల్లపాటు తగిన శిక్షణ పొందానన్నారు.
హైదరాబాద్‌ నుంచి తిరుపతి, విజయవాడ, అరుణాచలం క్షేత్రాలకు ద్విచక్ర వాహనంపై విజయవంతంగా వెళ్లి వచ్చాక, లభించిన ఆత్మవిశ్వాసంతో ఈ యాత్రకు సిద్ధమైనట్లు వెల్లడించారు. స్పోర్ట్స్‌ డాక్టర్‌ వద్ద వైద్య పరీక్షలన్నీ చేయించుకొని.. ఆయన సూచనల మేరకు ప్రయాణం సాగిస్తున్నట్లు వివరించారు. గతంలో ఉత్తర్‌ప్రదేశ్‌ వాసి ఇలా 1.16 లక్షల కి.మీ.లు ఇలా బైకుపై ప్రయాణించారని, ఆ రికార్డును అధిగమిస్తానని రమేశ్‌చంద్రబాబు ధీమా ప్రకటించారు.
