కరోనా వస్తే.. ఆస్పత్రికి వెళ్లడం కంటే ఇల్లే మేలట!

తెలంగాణ రాష్ట్రంలో కరోనా కేసులు పెరిగిపోవడం వల్ల ఆసుపత్రుల్లో పడకలు దొరకని పరిస్థితి ఉంది. కొన్నిసార్లు పడకల కోసం నిరీక్షించాల్సి వస్తోంది. అయితే లక్షణాలు లేకుంటే ఆసుపత్రులకు రావల్సిన అవసరం లేదని వైద్యులు సూచిస్తున్నారు. ఇంటి నుంచే వైద్య సేవలు పొందాలని పేర్కొంటున్నారు. ఇందుకోసం ప్రత్యేక ప్యాకేజీలు అందుబాటులోకి వచ్చాయి.

వైరస్‌ సోకిన తర్వాత చికిత్స తీసుకుందామంటే మహానగరంలోని ఆసుపత్రుల్లో పడకలు దొరకని పరిస్థితి నెలకొంది. చాలామంది 10-12 ఆసుపత్రులు తిరిగినా సరే... తమ వద్ద పడకలు లేవని తిప్పి పంపుతున్నారు. ఇక రోగికి వెంటిలేటర్‌ అవసరమైతే ముప్పు తిప్పలు పడాల్సిందే.

హైదరాబాద్‌లోని దాదాపు పేరున్న కార్పొరేట్‌ ఆసుపత్రుల్లో ఇదే పరిస్థితి. ప్రభుత్వ గాంధీ ఆసుపత్రిలో ఇప్పటికే 600 మంది చికిత్స పొందుతున్నారు. ఇందులో 250 మంది ఐసీయూలో ఉన్నారు. ఇక్కడా వెంటిలేటర్ల కొరత ఉంది. ఐసీఎంఆర్‌ విధానాల నేపథ్యంలో చాలా ఆసుపత్రులు రోగులను హోం క్వారంటైన్‌ చికిత్సల వైపు ప్రోత్సహిస్తున్నాయి.

10 శాతం మందికే ఆస్పత్రి అవసరం

కొవిడ్‌ రోగుల్లో 60-80 మందిలో లక్షణాలు లేకుండానే పాజిటివ్‌గా తేలుతోంది. దీంతో కొందరు ప్రభుత్వ ఆసుపత్రులకు, మరికొందరు కార్పొరేట్‌, ప్రైవేటు ఆసుపత్రుల బాట పడుతున్నారు. అక్కడ పడకలు లభించక నిరీక్షిస్తున్నారు. మరికొందరు ఇళ్లల్లో పెద్దలు, చిన్న పిల్లలు ఉండటంతో ఆసుపత్రి వైపు మొగ్గు చూపుతున్నారు.

ఇంట్లో చిన్న ప్రత్యేక గది ఉండి... కొంచెం సౌకర్యంగా ఉన్నాసరే కొవిడ్‌ రోగులు ఆసుపత్రులకు రానక్కర లేదని వైద్యులు పేర్కొంటున్నారు. 10 శాతం మందికే ఆసుపత్రిలో చికిత్స అవసరమంటున్నారు. దీంతో ప్రభుత్వ, కార్పొరేట్‌ ఆసుపత్రులు ప్రత్యామ్నాయ బాట పడుతున్నాయి.