'ప్రభుత్వ ఫలాలు దూదేకులకు దక్కడం లేదు'

దూదేకుల సామాజిక వర్గానికి చెందిన వారికి జారీచేసే బదిలీ ధ్రువీకరణ పత్రాల్లో ముస్లింలుగా పేర్కొనాలని కోరుతూ.. హైకోర్టులో పిల్ దాఖలైంది. గుంటూరుకు చెందిన షేక్ ఖాజావలి నూర్ బాషా ఈ వ్యాజ్యాన్ని దాఖలు చేశారు. పాఠశాల విద్యాశాఖ కార్యదర్శిని వ్యాజ్యంలో ప్రతివాదిగా చేర్చాలన్న హైకోర్టు.. విచారణను వాయిదా వేసింది.

విద్యాలయాలు దూదేకుల సామాజిక వర్గానికి చెందిన వారికి జారీచేసే బదిలీ ధ్రువీకరణ పత్రాల్లో.. ముస్లింలుగా పేర్కొనాలని కోరుతూ.. హైకోర్టులో పిల్ దాఖలైంది. గుంటూరుకు చెందిన షేక్ ఖాజావలి నూర్ బాషా ఈ వ్యాజ్యాన్ని దాఖలు చేశారు. ప్రధాన న్యాయమూర్తి జస్టిస్ జేకే మహేశ్వరి, జస్టిస్ టి.రజనీతో కూడిన ధర్మాసనం ఈ వ్యాజ్యంపై విచారణ జరిపింది. న్యాయవాది వైకే వాదనలు వినిపించారు.

దూదేకులు, నూర్ బాషాలుగా పిలుస్తున్న వారి కుల ధ్రువీకరణ, టీసీల్లో హిందువులుగా పేర్కొంటున్నారన్నారు. దీంతో మైనార్టీ ముస్లింలకు ఇచ్చే ప్రభుత్వ ఫలాలు దూదేకులకు దక్కడం లేదని చెప్పారు. ఈ అంశాల్ని పరిగణనలోకి తీసుకొని 'మతం' స్థానంలో వారిని ముస్లింలుగా పేర్కొనేలా ఆదేశించాలని ఉన్నత న్యాయస్థానాన్ని కోరారు. ఈ విషయాన్ని అధికారుల దృష్టికి తీసుకెళ్లి.. వినతి సమర్పించామన్నారు. ఆ వివరాల్ని పరిగణనలోకి తీసుకున్న ధర్మాసనం.. పాఠశాల విద్యాశాఖ కార్యదర్శిని వ్యాజ్యంలో ప్రతివాదిగా చేర్చాలని పేర్కొంటూ విచారణను వాయిదా వేసింది.

ఇదీ చదవండీ... కేబినెట్ నిర్ణయాలు: రూ. వెయ్యి కోట్లతో భూముల సమగ్ర రీ సర్వే