ఈకేవైసీ కోసం తిప్పలు... రాత్రింబవళ్లు పడిగాపులు

తెల్లరేషన్ కార్డుల క్రమబద్దీకరణలో భాగంగా ఈకేవైసీ చేయించుకోవాలన్న ప్రభుత్వ నిబంధన... ప్రజలకు పరీక్ష పెడుతోంది. సాంకేతిక సమస్యల కారణంగా ఆధార్‌, మీసేవ కేంద్రాల వద్ద జనం పడిగాపులు కాస్తున్నారు. విద్యార్థులు, రోజువారీ కూలీలు నానా యాతన పడుతున్నారు.

రాష్ట్రవ్యాప్తంగా 29వేల 788 రేషన్ దుకాణాలు ఉన్నాయి. మొత్తం కోటి 47లక్షల 29వేల 114 రేషన్ కార్డులుండగా... 4.2కోట్ల మంది లబ్దిదారులున్నట్లు అధికారిక లెక్కలు చెబుతున్నాయి. వీరందరూ తమ వేలిముద్రలను, ఆధార్ వివరాలను సంబంధిత డీలర్ వద్ద నమోదు చేయించుకోవాలని ప్రభుత్వం ఆదేశించింది. ఈ కేవైసీ ప్రక్రియ ఆధార్‌, ఫోన్‌ నెంబర్‌తో లింకు ఉండటంతో సమస్య మొదలైంది. క్షేత్రస్థాయిలో ఇబ్బందులు తలెత్తుతున్నాయి. సరిపడా ఆధార్‌ కేంద్రాలు లేకపోవడం, సర్వర్లు మొరాయించడంతో ప్రక్రియ ఆలస్యమవుతోంది.

ఈ కేవైసీ ప్రక్రియను లబ్దిదారులు తప్పనిసరిగా పూర్తి చేయించుకోవాలని అధికారులు చెబుతున్నారు. సాంకేతిక సమస్యలు పరిష్కరించాలని రేషన్ డీలర్ల సంఘం కోరుతోంది.

సాంకేతికత తెలియని విశాఖ మన్యం గిరిపుత్రులు ఆధార్ ఈకేవైసి చేసుకోవడానికి నానా అవస్థలు పడుతున్నారు. మండల కేంద్రాల చుట్టూ తిరుగుతున్నారు. పాడేరులో మీసేవ, స్టేట్ బ్యాంక్, పోస్టాఫీస్, కంప్యూటర్ దుకాణాలు, జిరాక్స్ దుకాణాలు కిటకిటలాడుతున్నాయి.

ఏజెన్సీ మండల కేంద్రాల్లో చాలాచోట్ల ఆధార్ నమోదు కేంద్రాలు లేవు. పాడేరులో స్టేట్ బ్యాంక్, పోస్ట్ ఆఫీస్ వద్ద ఈ కేవైసి అనుసంధానం చేస్తున్నారు. స్టేట్ బ్యాంకులో తక్కువ మందికే ఆన్​లైన్​లో చేస్తున్నారు. మిగిలిన వారికి ఓ తేదీ ఇచ్చి ఆ రోజున రమ్మంటున్నారు. పాడేరు చేరుకోవాలంటే ఆటోలు, జీపులు, ఇతర ప్రయాణ సాధనాలతో పిల్లా పాపా పెద్ద కలిసి ఎంతో డబ్బులు వెచ్చించి వస్తున్నారు. వారికి సకాలంలో ఆధార్ వేలిముద్రల అనుసంధానం అవ్వక డబ్బులు ఖర్చు పెట్టుకుని పనులు అవ్వక తిరిగి వెళ్ళిపోతున్నారు. చాలామంది గిరిజనులకు సెల్ ఆపరేటింగ్‌ తెలియదు. అలాంటి వృద్ధులకు ఆధార్ అనుసంధానమనేది కష్టమే అవుతోంది.