అందమైన అమ్మాయిలతో మాట్లాడండి... డేటింగ్ ఇష్టపడే వారితో గడపండి. నెల... మూడు నెలలు... సంవత్సరం... ప్యాకేజీలున్నాయంటూ కోల్కతా కేంద్రంగా కోట్లు కొల్లగొడుతున్న ముగ్గురు సైబర్ నేరస్థులను హైదరాబాద్ సైబర్ క్రైమ్ పోలీసులు అరెస్టు చేశారు. సోమా సర్కార్, అంబాసుర్, ఇమ్రాన్ లవ్ ఆర్ట్ డేటింగ్ వెబ్సైట్ ద్వారా రెండేళ్లలో దేశవ్యాప్తంగా యువకులను ఆకర్షించి రూ.8 కోట్లు కొల్లగొట్టారు. వీరితో పాటు కాల్ సెంటర్లో పని చేస్తున్న 20 మంది యువతులను అరెస్టు చేశారు. కోల్కతాకు చెందిన సోమా సర్కార్ రెండేళ్ల కిందట ఒక కాల్ సెంటర్ ఏర్పాటు చేశారు. అంబాసుర్, ఇమ్రాన్లను మేనేజర్లుగా... ఇరవై మంది యువతులను టెలీకాలర్లుగా నియమించుకున్నారు. సంస్థ నష్టాలు రావడం వల్ల.. పంథా మార్చేసి డేటింగ్ సైట్ను ప్రారంభించారు.
యువతుల ఫోటోలు, వారి వివరాలు ఉన్నందున.. వందల మంది యువకులు సభ్యత్వ రుసుం చెల్లించారు. సోమా కాల్ సెంటర్లో పనిచేసే యువతులే వారితో మాట్లాడేవారు. సభ్యత్వ రుసుం చెల్లించిన యువకుల వివరాలు డేటింగ్ సైట్లలో ఉంచేవారు. తర్వాత వారికి ఫోన్ చేసి మీ ఫోటోలు ఫలానా వెబ్సైట్లలో ఉన్నాయని... మీరు అనైతిక కార్యకలాపాల్లో పాల్గొంటున్నారని వారికి ఫోన్ చేసేవారు. కోల్కతాలో మీపై కేసులు నమోదవుతున్నాయని... పోలీసులు అరెస్టు చేయకుండా ఉండాలంటే కొంత సొమ్ము చెల్లించాలంటూ బాధితులను బెదిరించి డబ్బు వసూలు చేసేవారు. ఇలా సోమా సర్కార్ చేతిలో మోసపోయిన ఇద్దరు బాధితులు సైబర్ క్రైమ్ పోలీసుకు ఫిర్యాదు చేశారు. పోలీసులు వారిపై నిఘా పెట్టారు. కోల్కతాకు వెళ్లి ఆదివారం వారిని అదుపులోకి తీసుకున్నామని సీసీఎస్ అదనపు డీసీపీ రఘువీర్ వెల్లడించారు. అనంతరం హైదరాబాద్కు తీసుకువచ్చి జైలుకు తరలించినట్లు తెలిపారు.
ఇవీ చూడండి: తస్మాత్ జాగ్రత్త: గ్రామ వాలంటీర్లమంటూ.. దోచేశారు!
