రాయితీ అంటూ ఆకర్షించి.. కొన్నాక పూర్తి బిల్లు.. చెన్నై షాపింగ్​మాల్‌కు షాక్​!

రాయితీ అంటూ వినియోగదారుడిని ఆకర్షించి.. కొనుగోలు చేశాక పూర్తి బిల్లు వసూలు చేసిన చెన్నై షాపింగ్​మాల్​కు వినియోగదారుల కమిషన్ మొట్టికాయలు వేసింది. అదనంగా వసూలు చేసిన మొత్తం, పరిహారం, కేసు ఖర్చులు కలిపి మొత్తంగా రూ.15,306 చెల్లించాలని ఆదేశించింది.

రాయితీ అంటూ ఆకర్షించి.. పూర్తి బిల్లు వసూలు చేసిన సికింద్రాబాద్‌లోని చెన్నై షాపింగ్‌మాల్‌.. వినియోగదారుడికి రూ.15,306 చెల్లించాలని హైదరాబాద్‌ వినియోగదారుల వివాదాల పరిష్కార కమిషన్‌-3 ఆదేశించింది. తెలంగాణలోని నాచారం భవానీ నగర్‌కు చెందిన సీహెచ్‌ శ్రీకాంత్‌ చరవాణికి 2019 అక్టోబరు 19న చెన్నై షాపింగ్‌మాల్‌ నుంచి రాయితీకి సంబంధించిన సందేశం వచ్చింది. ఎస్‌బీఐ క్రెడిట్‌ కార్డు ద్వారా లావాదేవీ జరిపితే 5 శాతం వరకు బిల్లులో తగ్గింపు వస్తుందని పేర్కొన్నారు. అదే నెల 27న ఆ షాపింగ్‌ మాల్‌కు వెళ్లిన ఆయన.. రూ.4,083తో నూతన వస్త్రాలు, రూ.2,030తో ఆభరణాలు కొనుగోలు చేశారు.

ఎస్‌బీఐ కార్డుతో బిల్లు చెల్లించినా రాయితీ ఇవ్వలేదు. దీంతో వినియోగదారుల కమిషన్‌ను ఆశ్రయించగా.. విచారణ జరిపిన కమిషన్‌-3 అధ్యక్షుడు ఎం.రామ్‌గోపాల్‌రెడ్డి, సభ్యులు డి.శ్రీదేవి, జె.శ్యామల బెంచ్‌.. సాక్ష్యాధారాలు పరిశీలించి వినియోగదారుడి వాదనలతో ఏకీభవించింది. ఆయన నుంచి అదనంగా వసూలు చేసిన 5 శాతం (రూ.306), పరిహారం కింద రూ.10 వేలు, కేసు ఖర్చులు రూ.5 వేలు ఇవ్వాలని చెన్నై షాపింగ్‌మాల్‌ను ఆదేశించింది.

ఇదీ చూడండి..