వీడియో వైరల్​: పోటీలు పెట్టుకున్నారు..ఆపై కొట్టుకున్నారు..!

పండుగ కదా అని సరదాగా కబడ్డీ పోటీలు నిర్వహించుకున్నారు. ఆటలో మొదలైన చిన్నపాటి వివాదం.. ఇరు వర్గాల ఘర్షణకు దారితీసింది. కర్రలతో కొట్టుకునే దాకా వెళ్లింది. తెలంగాణలో ఈ ఘటన జరగగా..అందుకు సంబంధించిన వీడియోలు కాస్తా సామాజిక మాధ్యమాల్లో వైరల్​గా మారాయి.

తెలంగాణలోని జోగులాంబ గద్వాల జిల్లా మానవపాడు మండలం చెన్నిపాడులో క్రిస్మస్ పండుగ సందర్భంగా స్థానిక యువకులు కబడ్డీ పోటీలు నిర్వహించారు. ఈ సందర్భంగా ఉండవెళ్లి మండలం పుల్లూరుకు చెందిన యువకులకు.. పెబ్బేరు మండలం కంచిరావుపల్లికి చెందిన యువకులకు మధ్య పోటీ నిర్వహించగా.. వారి మధ్యలో చిన్నపాటి గొడవ జరిగింది. ఈ క్రమంలో పోటీలు నిర్వహిస్తున్న చెన్నిపాడు యువకులు, పుల్లూరు యువకుల మధ్య తోపులాటతో ఘర్షణ మొదలైంది.

చెన్నిపాడుకు చెందిన యువకులు ఒక్కసారిగా పుల్లూరుకు చెందిన యువకులపై కర్రలతో దాడి చేశారు. ఈ వీడియోలు సామాజిక మాధ్యమాల్లో చక్కర్లు కొట్టడం వల్ల ఇరు గ్రామాలకు చెందిన పెద్దలు రంగంలోకి దిగి.. యువకుల మధ్య రాజీ కుదిర్చినట్లు సమాచారం.