TS Collectors Meeting: కలెక్టర్లతో సీఎం కేసీఆర్ సమావేశం.. పథకాల అమలుపై ప్రధాన చర్చ

Collectors Meeting:వ్యవసాయం, దళితబంధు అంశాలు ప్రధాన ఎజెండాగా నేడు తెలంగాణలో కలెక్టర్ల సమావేశం జరగనుంది. పథకాల అమలు, ప్రత్యామ్నాయ పంటల సాగుపై విస్తృతంగా చర్చించనున్నారు. హైదరాబాద్​లోని ప్రగతిభవన్ వేదికగా మంత్రులు, కలెక్టర్లతో సమావేశం కానున్న సీఎం కేసీఆర్ ఓ కార్యాచరణ ఖరారు చేసి వారికి మార్గనిర్దేశం చేయనున్నారు.

Collectors Meeting: తెలంగాణ సీఎం కేసీఆర్ ఇవాళ అన్ని జిల్లాల కలెక్టర్లతో భేటీ కానున్నారు. ప్రగతిభవన్ వేదికగా జరగనున్న సమావేశంలో మంత్రులు, సీనియర్ అధికారులు, కలెక్టర్లు పాల్గొననున్నారు. దళితబంధు పథకం అమలు, తదుపరి కార్యాచరణపై సమావేశంలో చర్చిస్తారు. హుజురాబాద్ నియోజకవర్గంతోపాటు చింతకాని, తిరుమలగిరి, చారకొండ, నిజాం సాగర్ మండలాల్లో పైలట్ పద్ధతిన పథకాన్ని అమలు చేస్తున్నారు.

దళితబంధుపై ప్రధాన చర్చ

తెలంగాణలోని యాదాద్రి జిల్లా వాసాలమర్రితోపాటు హుజురాబాద్ నియోజకవర్గంలో కొంతమంది లబ్ధిదారులకు యూనిట్ల పంపిణీ కూడా పూర్తయింది. మిగతా వారికి సంబంధించి వివిధ దశల్లో ఉండగా నాలుగు మండలాల్లో ప్రక్రియ ప్రారంభం కావాల్సి ఉంది. ప్రస్తుత ఆర్థికఏడాదిలో అన్ని నియోజకవర్గాల్లోనూ కొన్ని కుటుంబాలకు దళితబంధు అమలు చేస్తామని తెలంగాణ సీఎం ఇప్పటికే ప్రకటించారు. ఈ నేపథ్యంలో పథకం అమలు, హుజురాబాద్ అనుభవాలపై కలెక్టర్ల సమావేశంలో విస్తృతంగా చర్చించనున్నారు. వాటి ఆధారంగా తదుపరి కార్యాచరణపై చర్చిస్తారు. అధికారులు, ప్రజాప్రతినిధులకు శిక్షణ విషయమై కూడా సమావేశంలో సూచనలు అందించనున్నారు.