15 వ ఆర్థికసంఘం సిఫార్సులు రాష్ట్రానికి తీవ్ర నష్టం కలిగించాయి. కేంద్ర పన్నుల్లో ఏపీ వాటా 4.30 శాతం నుంచి 4.11 శాతానికి తగ్గించడం వల్ల వచ్చే ఆర్థిక సంవత్సరంలో రాష్ట్రం దాదాపు 15వందల కోట్లకు పైగా నష్టపోనుంది. 2019-20 ఆర్థిక సంవత్సరంలో కేంద్ర పన్నుల్లో రాష్ట్రానికి 28, 242 కోట్లు రాగా...2020-21కి 32వేల 237 కోట్లకు పెరగనుంది. గతేడాదితో పోలిస్తే నికరంగా 4వేల కోట్లకు పైగా పెరిగింది. కానీ రాష్ట్రాల వాటాలను లెక్కించడానికి 15 వ ఆర్థికసంఘం తీసుకున్న కొలమానాల కారణంగా ఏపీకి 15 వందల 21 కోట్ల రూపాయలు నష్టపోవాల్సి వస్తుంది.
రెవెన్యూలోటు కింద రాష్ట్రానికి ఈ ఆర్థిక ఏడాది 5వేల 897 కోట్లు ఇవ్వాల్సిందింగా 15వ ఆర్థికసంఘం సిఫార్సు చేసింది. రాష్ట్రానికి ఈ ఏడాది 41వేల 54 కోట్ల రూపాయల రెవెన్యూలోటు ఏర్పడుతుందని అంచనా వేయగా....కేంద్ర పన్నుల్లో వాటా కింద 35వేల 156 కోట్లు పోను మిగిలిన 5వేల 897 కోట్లు లోటు ఉంటుందన్న ఉద్దేశంతోనే ఈ సిఫార్సు చేసినట్లు తెలుస్తోంది. 14వ ఆర్థికసంఘం సిఫార్సు మేరకు గత ఐదేళ్లలో రెవెన్యూలోటు కింద 22వేల 133 కోట్లు అందాయి. 2019-20 నాటికి రెవెన్యూలోటు 2వేల 499 కోట్లకే పరిమితమవుతుందని ఆ సంఘం అంచనా వేసింది. 2020-21 నాటికి మరింత తగ్గాల్సి ఉన్నా....ఏకంగా 5వేల 897 కోట్లకు చేరడం విశేషం. 14, 15 ఆర్థిక సంఘాల అంచనాల్లో గందరగోళం చూస్తుంటే...గడిచిన ఐదేళ్లలో రాష్ట్రానికి మరిన్ని నిధులు రావాల్సి ఉన్నట్లు తెలుస్తోంది.
స్థానిక సంస్థలకు రూ.4వేల కోట్ల నిధులు
* రాష్ట్రంలో గ్రామీణ స్థానిక సంస్థలకు కేంద్ర బడ్జెట్లో రూ.2,625 కోట్లు కేటాయించారు.
* పది లక్షల్లోపు జనాభా ఉన్న నగరాలకు రూ.994 కోట్లు, అంతకుమించి జనాభా ఉన్న నగరాలకు రూ.270 కోట్లు కలిపి పట్టణ స్థానిక సంస్థలకు మొత్తం రూ.1,264 కోట్లు కేటాయింపు
* విజయవాడకు రూ.124 కోట్లు కేటాయించారు. ఇందులో రూ.62 కోట్లు గాలి నాణ్యత మెరుగుదలకు, మరో రూ.62 కోట్లు ఘన వ్యర్థాల నిర్వహణకు ఇచ్చారు.
* విశాఖపట్నానికి రూ.146 కోట్లు కేటాయించారు. ఈ మొత్తాన్ని గాలినాణ్యత, ఘన వ్యర్థాల నిర్వహణకు చెరిసగం ఖర్చు చేస్తారు.
* రాష్ట్ర విపత్తు నిర్వహణ నిధి కింద ఏపీకి రూ.1,491 కోట్లు కేటాయించారు. ఇందులో కేంద్రం వాటా రూ.1,119 కోట్లు. రాష్ట్రం రూ.372 కోట్లు సమకూర్చుకోవాలి.
* పోషకాహార నిధుల కింద రూ.263 కోట్లు రానున్నాయి.
ఇదీ చదవండి: బడ్జెట్ 2020: నిర్మల పద్దులోని హైలైట్స్
