రాష్ట్ర ఎన్నికల కమిషనర్ పదవీకాలం కుదింపు ఆర్డినెన్స్‌కు సంబంధించిన వ్యాజ్యాలపై.... నేరుగా విచారణ జరపాలని హైకోర్టు నిర్ణయించింది. సోమవారం 2 పక్షాల న్యాయవాదులు కోర్టుకు హాజరై భౌతికదూరం పాటిస్తూ వాదనలు వినిపించాలని ఆదేశించింది. వ్యాజ్యాలతో సంబంధం ఉన్న ఏపీ, తెలంగాణలోని న్యాయవాదులకు.. పాసులు ఇచ్చి హైకోర్టుకు వచ్చేలా చర్యలు తీసుకుంటామని... ధర్మాసనం స్పష్టం చేసింది. ఈ విషయంలో తెలుగు రాష్ట్రాల డీజీపీలకు తగిన ఆదేశాలు ఇస్తామని ధర్మాసనం తెలిపింది.
ఆర్డినెన్స్ను సవాలు చేయొచ్చు
ఆర్డినెన్స్ను సవాలు చేస్తూ హైకోర్టులో నిమ్మగడ్డ రమేశ్ కుమార్ వేసిన వ్యాజ్యం సహా మరో 11 పిటిషన్లు దాఖలయ్యాయి. లాక్‌డౌన్ నేపథ్యంలో ఈ వ్యాజ్యాలపై హైకోర్టు వీడియోకాన్ఫరెన్స్ ద్వారా విచారణ జరిపింది. సుప్రీంకోర్టు తీర్పు ప్రకారం ఆర్డినెన్స్ సవాలు చేసే హక్కు ప్రజలకు ఉంటుందని ఓ పిటిషనర్ తరఫు న్యాయవాది వేదుల వెంకటరమణ వాదించారు. ఈ తరహాలో ఆర్డినెన్స్ జారీ చేసే అధికారం ప్రభుత్వానికి లేదని వివరించారు.
