యురేనియం గనుల తవ్వకాల్ని విస్తరించేందుకు అధికారులు చేపట్టిన ప్రజాభిప్రాయ సేకరణను నిలుపుదల చేస్తూ హైకోర్టు ఇచ్చిన స్టేను ఎత్తివేయాలని యురేనియం కార్పోరేషన్ ఆఫ్ ఇండియా లిమిటెడ్ దాఖలు చేసిన అనుబంధ పిటిషన్ పై హైకోర్టు విచారణ జరిపింది . కౌంటర్ ప్రతులను పరిశీలించి తదుపరి విచారణ ఈనెల 11 కు వాయిదా వేసింది . హైకోర్టు ప్రధాన న్యాయమూర్తి జస్టిస్ ఏకే గోస్వామి , జస్టిస్ సి.ప్రవీణ్ కుమార్ తో కూడిన ధర్మాసనం ఈ మేరకు ఆదేశాలు జారీచేసింది . స్టేను ఎత్తివేయాలని యూసీఐఎల్ తరఫు సీనియర్ న్యాయవాది వేదుల వెంకటరమణ వాదనలు వినిపించారు . ప్రజాభిప్రాయ సేకరణ కొనసాగేందుకు అనుమతివ్వాలని కోరారు .
పిటిషనర్ తరపు న్యాయవాది కేఎస్ మూర్తి వాదనలు వినిపిస్తూ .. పర్యావరణ శాఖ గతంలో విధించిన షరతులను యూసీఐఎల్ పట్టించుకోలేదన్నారు . కేంద్ర పర్యావరణ మంత్రిత్వ శాఖ యురేనియం ఖనిజ తవ్వకాల విస్తరణకు అనుమతివ్వడం సరికాదన్నారు . చట్ట నిబంధనలను పాటించకుండా అభిప్రాయ సేకరణ సరికాదన్నారు . స్టే ఎత్తివేతను వ్యతిరేకించారు . ఇరువైపు వాదనలు విన్న ధర్మాసనం .. ప్రతివాదులు వేసిన కౌంటర్ ప్రతులు తమ ముందున్న ఫైల్ లోకి చేరలేదని తెలిపింది . వాటిని వ్యాజ్యంతో జతచేయాలని రిజిస్ట్రీని ఆదేశిస్తూ విచారణను ఈనెల 11 కు వాయిదా వేసింది.
ఇదీ చదవండి: పల్లె పోరు: నేటితో ముగియనున్న రెండో దశ నామినేషన్ల స్వీకరణ
