'అంగన్​వాడీల్లోనూ నాడు - నేడు..'

రాష్ట్రవ్యాప్తంగా అంగన్‌వాడీల్లోనూ ‘నాడు – నేడు’ కార్యక్రమాన్ని అమలు చేయాలని ప్రభుత్వం నిర్ణయించింది. 24 వేల అంగన్ వాడీల్లో పాఠశాలల తరహాలో సదుపాయాలు కల్పించాలని.... కొత్తగా 31 వేల అంగన్ వాడీకేంద్రాలు నిర్మించాలని ముఖ్యమంత్రి వైఎస్ జగన్ అధికారులను ఆదేశించారు. అంగన్ వాడీ కేంద్రాలన్నీ ప్రీ ప్రైమరీ స్కూల్స్‌ తరహాలో అభివృద్ధి చేయాలని సూచించారు. పిల్లలు, తల్లులకు ఇచ్చే పౌష్టికాహారం నాణ్యత పెంచేందుకు కార్యాచరణ ప్రణాళిక సిద్దం చేయాలని నిర్దేశించారు.

రాష్ట్రంలో అంగన్​వాడీల్లోనూ నాడు - నేడు కార్యక్రమాలు చేపట్టాలని ముఖ్యమంత్రి జగన్​ అధికారులను ఆదేశించారు. తాడేపల్లిలోని క్యాంపు కార్యాలయంలో మహిళా - శిశు సంక్షేమ సంక్షేమ శాఖపై ఆయన సమీక్షించారు. ఈ సమావేశానికి మంత్రి తానేటి వనిత, సీఎస్​ నీలం సాహ్ని, ఇతర అధికారులు హాజరయ్యారు.

ముఖ్యమంత్రి ఆదేశాలివే..

• పాఠశాలల్లో నాడు - నేడు కింద 9 రకాల సదుపాయాలు కల్పిస్తుండగా.. అదే తరహాలో అంగన్​వాడీల్లోనూ అమలు చెయ్యాలి.
• ఫర్నీచర్, ఫ్యాన్లు, ఫ్రిజ్, తాగునీరు, మరుగుదొడ్లు, బ్లాక్‌ బోర్డులు, ప్రహరీగోడతో సహా ఇతర సౌకర్యాలు కల్పించాలి.
• అంగన్​వాడీల అభివృద్ధికై విద్యాశాఖ అధికారులతో కలిసి పనిచేయాలి.
• అంగన్​వాడీల్లో పరిశుభ్ర వాతావరణం ఉండేలా చర్యలు తీసుకోవాలి.
• దాదాపు 24 వేల అంగన్​వాడీ భవనాల్లో అభివృద్ధి పనులపై అంచనాలు రూపొందించాలి.
• భవనాల్లేని చోట 31 వేల అంగన్‌వాడీల నిర్మాణానికి అంచనాలు రూపొందించాలి.
• అంగన్‌వాడీలన్నీ ప్రీ స్కూల్‌ తరహా విధానంలోకి రావాలి.
• అంగన్‌వాడీల్లో గర్భిణీలు, తల్లులు, పిల్లలకు ఇచ్చే ఆహారం నాణ్యంగా ఉండాలి.
• పౌష్టికాహారం అందించడానికి తీసుకోవాల్సిన చర్యలపై నివేదిక సమర్పించాలి.

గత ప్రభుత్వ హయాంలో తల్లులు, పిల్లలకు పౌష్టికాహారంపై కేవలం రూ.740 కోట్లు ఖర్చు చేస్తే.. తమ ప్రభుత్వంలో తొలి ఏడాదిలో రూ.1100 కోట్లు ఖర్చు చేసినట్లు సీఎం జగన్​ తెలిపారు. ఈ ఏడాది రూ.1862 కోట్లకు పైగా ఖర్చు చేయడానికి సిద్ధంగా ఉన్నట్లు స్పష్టం చేశారు. అంగన్​వాడీల్లో నాణ్యమైన పౌష్టికాహార పంపిణీపై ప్రణాళిక రూపొందించాలని అధికారులను ఆదేశించిన ఆయన.. వీటన్నింటికీ బకాయిలు లేకుండా గ్రీన్‌ఛానల్‌లో చెల్లింపులు జరిగేలా చూడాలని అధికారులకు నిర్దేశించారు.

ఇదీ చూడండి..