రాజధాని అమరావతిలో కేంద్రప్రభుత్వ సంస్థలు, ప్రభుత్వరంగ సంస్థలకు 2016 నుంచి 2019 మధ్యలో సీఆర్డీఏ భూములు కేటాయించింది. 24 కేంద్రప్రభుత్వ సంస్థలకు 208 ఎకరాలు, 18 కేంద్ర ప్రభుత్వ రంగ సంస్థలకు 27 ఎకరాల్ని ఇచ్చింది. కేంద్ర ప్రభుత్వ రంగ సంస్థలకు ఎకరం రూ. 4 కోట్ల చొప్పున కేంద్ర ప్రభుత్వ సంస్థల్లో కొన్నింటికి ఉచితంగా మరికొన్నింటికి తక్కువ ధరకు గత ప్రభుత్వం భూములు కేటాయించింది. జియోలాజికల్‌ సర్వే ఆఫ్‌ ఇండియా... తుళ్లూరు-రాయపూడి మధ్య తమకు కేటాయించిన స్థలానికి ఇటీవల ప్రహరీ నిర్మించింది. నేషనల్‌ ఇన్‌స్టిట్యూట్‌ ఆఫ్‌ డిజైన్‌ కొంతమేర నిర్మాణాలు చేపట్టింది. మిగతా సంస్థలేవీ నిర్మాణాలు మొదలుపెట్టలేదు. ప్రధాని మోదీ స్వయంగా వచ్చి అమరావతికి శంకుస్థాపన చేశారు. రాష్ట్రంలో పరిపాలనా వ్యవహారాలన్నీ అమరావతి నుంచే సాగుతున్నాయి. అలాంటప్పుడు కేంద్ర ప్రభుత్వ సంస్థల నిర్మాణాలు చేపట్టకపోవటంపై విమర్శలు వస్తున్నాయి.
ఇప్పుడైనా కేంద్రం స్పందించాలి...
2018లో కేంద్ర ప్రభుత్వం సెంట్రల్‌ సెక్రటేరియేట్‌ విధానం తీసుకొచ్చింది. దీని ప్రకారం ఆయా రాష్ట్రాల రాజధానుల్లో కేంద్ర ప్రభుత్వ కార్యాలయాల్ని ఒకేచోట ఏర్పాటు చేయాల్సి ఉంటుంది. అప్పట్లో కేంద్ర ప్రభుత్వం సీఆర్డీఏ ను స్థలం కోరగా... 22.5 ఎకరాలు కేటాయించారు. కానీ ఇప్పటి వరకూ పనులు మొదలుపెట్టలేదు. 2022-23 బడ్జెట్‌లో అమరావతిలో సెంట్రల్‌ సెక్రటేరియేట్‌కి కేంద్ర పట్టణాభివృద్ధిశాఖ రూ.లక్ష మాత్రమే కేటాయించింది. రాష్ట్ర ప్రభుత్వం మూడు రాజధానుల పేరుతో గందరగోళం సృష్టించినా హైకోర్టు తీర్పుతో అమరావతి రాజధాని అనే విషయం స్పష్టత వచ్చింది. ఇప్పుడైనా కేంద్రం ఈ విషయంలో స్పందించాలని విపక్షాలు, ఐకాస నేతలు కోరుతున్నారు.
కేంద్ర ప్రభుత్వ పెద్దల్ని కలవాలని నిర్ణయం..
వైకాపా అధికారంలోకి వచ్చాక రాజధాని నిర్మాణం ఆగిపోయింది. దీంతో భూములు తీసుకున్న కేంద్ర ప్రభుత్వ సంస్థలు అటువైపు చూడలేదు. అమరావతిలో స్థలాలు తీసుకున్న సంస్థల కార్యాలయ భవనాల నిర్మాణం వెంటనే మొదలుపెట్టడంతో పాటు, ఇతర కేంద్రప్రభుత్వ విభాగాల కార్యాలయాలన్నీ అమరావతిలో ఏర్పాటు చేసేందుకు చర్యలు తీసుకోవాల్సిన బాధ్యత కేంద్రంపై ఉంది. ఇప్పటికే రాష్ట్రానికి చెందిన రాజ్యసభ సభ్యులు సుజనా చౌదరి, భాజపా జాతీయ కార్యదర్శి సత్యకుమార్ దృష్టికి రాజధాని రైతులు ఈ విషయాల్ని తీసుకెళ్లారు. అలాగే కేంద్ర ప్రభుత్వ పెద్దల్ని కలవాలని నిర్ణయించారు.
దిల్లీకి వెళ్లనున్న ఐకాస బృందం...
ఏప్రిల్ మూడో తేదీ నుంచి 7వ తేదీ వరకు ఐకాస బృందం దిల్లీలో పర్యటించనుంది. ముఖ్యంగా రాజధానిలో కేంద్ర ప్రభుత్వ కార్యాలయాల నిర్మాణాలు ప్రారంభించాలని కోరనున్నారు. తద్వారా రాష్ట్ర ప్రభుత్వంపై ఒత్తిడి పెరుగుతుందని, అలాగే అమరావతి విషయంలో హైకోర్టు ధర్మాసనం తీర్పు అమలు చేయాల్సిన పరిస్థితి ఏర్పడుతుందని జేఏసీ నేతలు భావిస్తున్నారు. అలాగే క్యాపిటల్ గెయిన్స్ మినహాయింపు గడువు పెంపు, రాజధాని నిర్మాణానికి నిధుల కేటాయింపు అంశాలపై విజ్ఞప్తి చేయనున్నారు. దిల్లీ పర్యటనలో భాగంగా కేంద్ర మంత్రులతో ఐకాస నేతలు భేటీ కానున్నారు. అవకాశం ఉంటే ప్రధానమంత్రి నరేంద్ర మోదీని, హోంమంత్రి అమిత్ షా ను కలవాలని భావిస్తున్నారు.
ఇదీ చదవండి: ఏపీకి ప్రత్యేక హోదా లేదు.. మరోసారి స్పష్టం చేసిన కేంద్ర హోంశాఖ
