Zomato Intercity legends : ఆన్లైన్ ఫుడ్ డెలివరీ సర్వీసుల్లో దూసుకెళ్తున్న జొమాటో.. ఇప్పుడు మరో అడుగు ముందుకేసింది. ఇంటర్సిటీ లెజెండ్స్ పేరుతో మరో కొత్త సర్వీసును అందుబాటులోకి తీసుకొచ్చింది. ఇప్పటివరకు మనం ఉన్న ప్రాంతంలో దొరికే ఆహార పదార్థాలను మాత్రమే ఆన్లైన్లో ఆర్డర్ చేసుకునే సౌకర్యం ఉండేది. అయితే.. ఇప్పుడు ఇతర ప్రాంతాల(నగరాల) నుంచి కూడా జొమాటో ద్వారా ఆహారం తెప్పించుకోవచ్చు. దీని కోసమే ఇంటర్సిటీ లెజెండ్స్ అనే పేరుతో కొత్త సర్వీసును పరిచయం చేసింది.
ఈ డెలివరీ సర్వీస్తో ఇతర రాష్ట్రాలు, ప్రముఖ నగరాలకు చెందిన ప్రసిద్ధ రెస్టారెంట్ల నుంచి బాగా ప్రాచుర్యం పొందిన వంటకాలను ఆర్డర్ చేసుకోవచ్చని చెప్పారు జొమాటో సీఈఓ దీపిందర్ గోయల్. అయితే ఆర్డర్ డెలివరీకి మాత్రం కాస్త ఎక్కువ సమయమే పట్టొచ్చని.. దూరాన్ని బట్టి ఒకరోజు కంటే ఎక్కువ కూడా అవ్వొచ్చని పేర్కొన్నారు.
''కోల్కతా నుంచి రసగుల్లా, హైదరాబాద్ బిర్యానీ, బెంగళూరు నుంచి మైసూర్ పాక్, లఖ్నవూ నుంచి కెబాబ్, ఓల్డ్ దిల్లీ నుంచి బటర్ చికెన్, జైపుర్ నుంచి ప్యాజ్ కచోడీ వంటి మంచి మంచి వంటకాలను ఆర్డర్ చేసుకోవచ్చు.''
- దీపిందర్ గోయల్, జొమాటో సీఈఓ
అయితే ప్రస్తుతానికి ఈ ఇంటర్సిటీ లెజెండ్స్ సర్వీస్ దక్షిణ దిల్లీ, గురుగ్రామ్కే పరిమితమైంది. అంటే అక్కడ నివసిస్తున్న వారికి మాత్రమే ఇప్పుడు ఇతర ప్రాంతాల నుంచి ఆర్డర్ చేసుకునే సౌకర్యం అందుబాటులో ఉంది. వీరు కోల్కతా, హైదరాబాద్, లఖ్నవూ, జైపుర్, బెంగళూరు, మథుర, చెన్నై, ఆగ్రా, భువనేశ్వర్ వంటి నగరాల నుంచి వంటకాలను జొమాటో ద్వారా ఆర్డర్ చేసుకోవచ్చు. అయితే.. ఆ నగరాల్లో అన్ని రెస్టారెంట్లు మనకు కనిపించవు. కొన్ని ఎంపిక చేసిన ప్రముఖ రెస్టారెంట్ల నుంచి మాత్రమే ఆర్డర్ చేసుకోవచ్చు.
ఇతర ప్రాంతాల నుంచి ఆర్డర్ చేసిన ఆహారం ఫ్లైట్లో వచ్చేస్తుంది. అక్కడ ఆహారాన్ని భద్రంగా ఉంచేందుకు అన్ని జాగ్రత్తలు తీసుకుంటున్నట్లు జొమాటో సీఈఓ వెల్లడించారు. ఈ సర్వీసును క్రమక్రమంగా ఇతర ప్రాంతాలకు విస్తరిస్తామని గోయల్ స్పష్టం చేశారు. ఈ సౌకర్యం అందుబాటులోకి వచ్చాక ఈ ఆన్లైన్ ఫుడ్ డెలివరీ సంస్థకు ఆదరణ మరింత పెరిగే అవకాశాలున్నాయని నిపుణులు అంచనా వేస్తున్నారు.
ఇవీ చూడండి: యువతకు ఆదర్శం ఈ జొమాటో గర్ల్: ఓ వైపు పని.. మరోవైపు చదువు!
జొమాటో సీఈఓ బంపర్ ఆఫర్.. విరాళంగా ఉద్యోగులకు రూ.700 కోట్లు!
