స్టూడెంట్ ట్రావెల్ ఇన్సూరెన్స్‌ను విదేశాల్లో చదువుతున్న విద్యార్థుల బీమా అవసరాలను తీర్చడానికి రూపొందించారు. విదేశాల్లో చదువుకోవడానికి వెళ్లే విద్యార్థులు ప్రయాణ సమయంలో భారతదేశంలో ప్రయాణ బీమాను కొనుగోలు చేయొచ్చు. ఈ బీమా.. మెడికల్‌, నాన్‌-మెడికల్‌, అనేక అత్యవసర పరిస్థితుల్లో జరిగే నష్టాలను కవర్‌ చేస్తుంది. బీమా, వైద్యేతర మెడికల్‌ ఎమర్జెన్సీలతో పాటు పాలసీ పొడిగింపు, పునరుద్ధరణ ఫీచర్లతో లభిస్తుంది. ఇది విద్యార్థులు విదేశాలలో ఉన్నంతకాలం యాక్టివ్‌గా ఉంటుంది. ఊహించని సంఘటనల వల్ల కలిగే ఆర్థిక నష్టాలను తొలగించడానికి ప్రయాణ బీమా పాలసీని కొనుగోలు చేయడం చాలా ప్రయోజనకరం.
ట్రావెల్ ఇన్సూరెన్స్ వల్ల ప్రయోజనాలు
ఏదైనా అత్యవసర ఆస్పత్రి ఖర్చులను, ఊహించని అనారోగ్యాలు, శారీరక గాయాలు కలిగినప్పుడు వైద్య బిల్లులు, చికిత్స ఖర్చులను కవర్‌ చేస్తుంది. ప్రయాణ సమయంలో లగేజీ పోయినట్లయితే జరిగిన నష్టాన్ని కవర్‌ చేస్తుంది. ప్రయాణాల్లో జాప్యం వంటి ఇబ్బందులు తలెత్తినప్పుడు జరిగే నష్టాన్ని కవర్‌ చేస్తుంది.
స్పాన్సర్‌ కవర్‌
విద్యార్థికి ఉండే స్పాన్సర్‌ మరణించిన సందర్భంలో చదువుకు ఏదైనా అంతరాయం ఏర్పడితే బ్యాలెన్స్‌ కోర్సు ఫీజును కవర్‌ చేస్తుంది.
పాస్‌పోర్ట్‌
ఒక విద్యార్థి తన పాస్‌పోర్ట్‌ను పోగొట్టుకున్నట్లయితే తాత్కాలిక పాస్‌పోర్ట్‌ను అందిస్తుంది.
ఏ వయసువారికి పాలసీ?:
- విదేశాల్లో ఉన్నత విద్యను అభ్యసిస్తున్న 16-35 సంవత్సరాల మధ్య వయసు గల భారతీయ విద్యార్థులు ప్రయాణ బీమాకు అర్హులు.
- ప్రయాణ బీమా వ్యవధి 1 నుంచి 3 సంవత్సరాల వరకు ఉంటుంది.
పాలసీ కవరేజీ ఎంత?
విదేశాల్లో ఉన్న విశ్వవిద్యాలయాలు వారి విద్యార్థులకు నిర్దిష్ట బీమా అవసరాలను కలిగి ఉంటాయి. వాటిని విశ్వవిద్యాలయ వెబ్‌సైట్లలో స్పష్టంగా పేర్కొంటారు. కొన్ని విద్యాలయాలు అడ్మిషన్‌ ప్రక్రియలో కనీస అవసరాలను సూచిస్తాయి. అమెరికా, కెనడాకు కనీసం రూ.1.50 కోట్లు, యూకే, ఇతర దేశాలకు రూ.37 లక్షల నుంచి రూ.1.50 కోట్ల వరకు విద్యార్థులకు ప్రయాణ కవరేజీని కలిగి ఉంటాయి. స్టూడెంట్ ట్రావెల్ ఇన్సూరెన్స్ కలిగి ఉంటే ప్రపంచవ్యాప్తంగా కవరేజీ ఉన్నట్టే. అయితే ఇది ఒక దేశం నుంచి మరో దేశానికి భిన్నంగా ఉంటుంది. సేవల లభ్యత, ప్రస్తుత ఆర్థిక పరిస్థితుల ప్రకారం మారుతూ ఉంటాయి.
వైద్య ఖర్చులు
విదేశాల్లో వైద్య ఖర్చులు చాలా అధికం. ప్రయాణ సమయంలో బీమా చేయించుకున్న వ్యక్తి గాయపడినా, అనారోగ్యం పాలైనా, పాలసీ అత్యవసర వైద్య ఖర్చులను కవర్‌ చేస్తుంది. ఈ పాలసీ.. అనారోగ్యం, గాయాల కారణంగా ఆస్పత్రిలో చేరితే సాయం అందిస్తుంది. దంత చికిత్స ఖర్చుల్లో కూడా డిస్కౌంట్‌ లభిస్తుంది. పాలసీ డాక్యుమెంట్‌లో పేర్కొన్న విధంగా వ్యక్తిగత గాయాలు, అనారోగ్యం, ఆస్పత్రిలో చేరడం, ప్రమాదాలు వంటి అన్ని వైద్య ఖర్చులను ప్రయాణ బీమా కవర్‌ చేస్తుంది.
ఏ పరిస్థితుల్లో బీమా వర్తిస్తుంది?
విద్యార్థి పర్యటన సమయంలో దొంగతనం, సామాను కోల్పోవడం, ఏదైనా నష్టం లాంటి పరిస్థితుల్లో బీమా వర్తిస్తుంది.
పునరావాసం
ఏదైనా ప్రకృతి వైపరీత్యాలు, విపత్తులు సంభవించినప్పుడు పాలసీ 'ఆశ్రయం' అందిస్తుంది. దీంతో అత్యవసర పరిస్థితుల్లో విద్యార్థికి పునరావాసం దొరుకుతుంది.
న్యాయపరమైన విషయాలు
వివిధ దేశాలు వేర్వేరు చట్టాలు, నిబంధనలను కలిగి ఉన్నాయి. విద్యార్థి న్యాయపరమైన విషయాల్లో ఇబ్బందులు ఎదుర్కొంటే.. ప్రయాణ బీమా నష్టపరిహారాన్ని అందిస్తుంది. బెయిల్‌ పొందడంలో సహాయపడుతుంది. అందువల్ల విద్యార్థుల విదేశీ పర్యటనల సమయంలో ప్రయాణ బీమా చాలా ముఖ్యమైనది.
మినహాయింపులు
ప్రయాణ సమయంలో అజాగ్రత్త లేదా నిర్లక్ష్యం వల్ల బ్యాగ్‌లోని వస్తువులను కోల్పోవడం, సామాన్లు పాక్షికంగా దెబ్బతినడం లాంటి వాటి వల్ల నష్టం కలిగితే బీమా కవర్‌ కాదు. ఆత్మహత్య, మానసిక రుగ్మతలు, సొంతంగా హాని చేసుకోవడం, క్షణికావేశం సందర్భంగా ఆందోళన, ఒత్తిడి, నిరాశకు గురికావడం, మాదకద్రవ్యాలు సేవించడం, హెచ్‌ఐవీ, ఎయిడ్స్‌ వంటి పరిస్థితుల కారణంగా నష్టాలు జరిగినా పాలసీ కవర్‌ చేయదు. యుద్ధం లేదా అణు ముప్పు కారణంగా తలెత్తే నష్టాలు పాలసీలో కవర్‌ కావు.
రెన్యువల్‌
- విద్యార్థి ప్రయాణ బీమాకు 1-3 సంవత్సరాల వ్యవధి ఉంటుంది.
- ఇప్పటికే ఉన్న పాలసీ కాలపరిమితి ముగిసిపోతే పునరుద్ధరించుకోవచ్చు.
- చాలా బీమా కంపెనీలు ఆటో-రెన్యూవల్‌ ఆప్షన్‌ను కలిగి ఉంటాయి.
ఇవీ చదవండి:
