సార్వత్రిక ఎన్నికల ముందు వినియోగదారులకు పన్ను మినహాయింపు పెంపుతో స్టాక్ మార్కెట్లు లాభాల బాట పట్టాయి. బాంబే ఎక్స్చేంజి సూచీ-సెన్సెక్స్ 212 పాయింట్లు(0.59 శాతం) పెరిగి 36,469.43 పాయింట్ల వద్ద ముగిసింది. జాతీయ స్టాక్ ఎక్స్చేంజి సూచీ-నిఫ్టీ 62.70 పాయింట్లు(0.58 శాతం) ఎగబాకి 10893.65 వద్ద స్థిరపడింది.
ఆదాయపు పన్ను పరిమితిని పెంపుతోపాటు, చిన్న సన్న కారు రైతులకు రూ. 6వేలు అందించనున్నట్లు పీయూష్ గోయల్ బడ్జెట్ ప్రసంగంలో ప్రకటించారు. వీటన్నింటితో కొనుగోలు శక్తి పెరగనున్న దృష్ట్యా మదుపరుల సెంటిమెంటు సానుకూలంగా ప్రభావితమైంది. వాహన, వినియోగ వస్తువుల షేర్లు వృద్ధిలోకి వచ్చాయి.
ఇంట్రాడే తీరిది...
మొదట 550 పాయింట్ల లాభపడ్డ సెన్సెక్స్ 36,771.14 పాయింట్ల వద్ద గరిష్ఠాన్ని తాకింది. అనంతరం 36,221.32 పాయింట్ల వద్ద కనిష్ఠాన్ని చేరుకుంది. అదే సమయంలో నిఫ్టీ 10,983.45 పాయింట్ల వద్ద అత్యధికాన్ని...10,813 పాయింట్ల వద్ద అత్యల్పాన్ని తాకింది.
వివిధ రంగాల తీరు..
బీఎస్ఈలోని ఆటో, ఎఫ్ఎమ్సీజీ, స్థిరాస్తి సూచీలు 2.62 శాతం వరకు లాభపడ్డాయి.
సెన్సెక్స్లో హీరో మోటోకార్ప్, మారుతీ, హెచ్సీఎల్ టెక్, ఏషియన్ పెయింట్స్, బజాజ్ ఆటో, బజాజ్ ఫినాన్స్, హెచ్డీఎఫ్సీ, రిలయన్స్, హెచ్యూఎల్, భారతీ ఎయిర్టెల్, పవర్ గ్రిడ్ అత్యధికంగా 7.48 శాతం వరకు లాభపడ్డాయి.
వేదాంత అత్యధికంగా 17.82 శాతం నష్టపోయింది. గురువారం నాడు విడుదల చేసిన త్రైమాసిక ఫలితాల్లో 25.54 శాతం తగ్గుదలతో మదుపరులు అమ్మకాలకు దిగారు.
బ్యాంకింగ్ రంగం అత్యధికంగా నష్టాల్లో ఉంది. యస్ బ్యాంకు, ఎస్బీఐ, ఐసీఐసీఐ బ్యాంకు, యాక్సిస్ బ్యాంకుల షేర్లు 4.68 శాతం వరకు పడిపోయాయి.
ఇతర మార్కెట్ల తీరిది...
ఆసియా మార్కెట్లు మిశ్రమంగా ఉన్నాయి. షాంఘై కాంపోజిట్ సూచీ 1.30 శాతం, జపాన్ నిక్కీ 0.07 శాతం లాభపడ్డాయి. హాంకాంగ్కు చెందిన హ్యాంగ్సెంగ్ సూచీ 0.04 శాతం, కొరియాకు చెందిన కొస్పి సూచీ 0.06 శాతం నష్టపోయాయి.
జర్మనీకి చెందిన ఫ్రాంక్ఫర్ట్ డీఏఎక్స్ సూచీ 0.20 శాతం, ప్యారిస్ సీఏసీ సూచీ 0.14 శాతం, లండన్ ఎఫ్టీఎస్ఈ 0.37 శాతం వృద్ధిలో కొనసాగుతున్నాయి.
రూపాయి, ముడిచమురు...
అమెరికా డాలరుతో పోల్చితే రూపాయి 24 పైసలు పడిపోయింది. ప్రస్తుతం మారక విలువ 71.32గా ఉంది. అంతర్జాతీయ ముడిచమురు ప్రామాణికం -బ్రెంట్ సూచీ స్వల్పంగా పడిపోయింది. బ్యారెల్ ముడిచమురు ధర 60.53 డాలర్లుగా ఉంది.
