ర్యాంకుల కోసం చైనా అక్రమాలు- వరల్డ్ బ్యాంక్ సంచలన నిర్ణయం!

పెట్టుబడుల ర్యాంకింగ్​లో చైనా (China Fraud) అక్రమాలు చేసినట్లు ఇటీవల ఆరోపణలు వచ్చిన నేపథ్యంలో వరల్డ్ బ్యాంక్ కీలక నిర్ణయం తీసుకుంది. వివిధ దేశాల్లో పెట్టుబడులు, వ్యాపార సానుకూలతలను తెలిపే 'ఈజ్​ ఆఫ్​ డూయింగ్​ బిజినెస్' (WB Doing Business report) నివేదికను ప్రచురించడం నిలిపేస్తున్నట్లు తెలిపింది.

వివిధ దేశాల్లో.. పెట్టుబడులు, వ్యాపార అనుకూలతలను తెలిపే 'ఈజ్ ఆఫ్​ డూయింగ్ బిజినెస్​' నివేదికను ప్రచురించడం నిలిపివేయాలని వరల్డ్ బ్యాంక్​ సంచలన నిర్ణయం తీసుకుంది. ఈ నివేదికలో ఇచ్చే ర్యాంకింగ్స్​ను తారుమారు చేసేలా అక్రమాలు జరిగాయన్న ఆరోపణలే ఇందుకు కారణంగా తెలిసింది.

ముఖ్యంగా 2017లో చైనా ర్యాంక్​ను పెంచాలని.. కొంత మంది ఉన్నతాధికారులు కింది స్థాయి సిబ్బందిని ఒత్తిడి చేసినట్లు ఇటీవల ఓ కథనం ద్వారా వెలుగులోకి వచ్చింది. ఈ ఆరోపణలు వరల్డ్ బ్యాంక్ దృష్టికి వెళ్లాయి.

చైనా చేసిన అక్రమాలు ఇన్నాళ్లకు బయటపడ్డాయని భారత ప్రభుత్వ వర్గాలు పేర్కొన్నాయి. ఇది భారత్​కు కచ్చితంగా కలిసొచ్చే విషయమని పేర్కొన్నాయి. ముఖ్యంగా తయారీ పరిశ్రమలు భారత్​కు తరలే అవకాశాలున్నట్లు విశ్లేషకులు అభిప్రాయపడ్డారు.

2019లో వరల్డ్ బ్యాంక్ ప్రచురించిన 'ఈజ్​ ఆఫ్​ డూయింగ్ బిజినెస్'​ నివేదికలో భారత్​ ర్యాంక్ 14 స్థానాలు మెరుగై.. 63కి చేరింది.

ఇదీ చదవండి: Petrol GST news: అప్పుడు లీటర్ పెట్రోల్ రూ.56, డీజిల్ రూ.50!