భారతీయ జనతా పార్టీపై కాంగ్రెస్ సీనియర్ నాయకులు రణ్దీప్ సుర్జేవాలా, కేసీ వేణుగోపాల్ తీవ్ర విమర్శలు చేశారు. కర్ణాటకలో జేడీఎస్-కాంగ్రెస్ సంకీర్ణ ప్రభుత్వాన్ని కూలదోసేందుకు జరుగుతున్న కుట్ర వెనుక ప్రధానమంత్రి నరేంద్ర మోదీ, భాజపా అధినేత అమిత్ షా హస్తం ఉందని ఆరోపించారు. పార్లమెంటులో ఈ అంశాన్ని లేవనెత్తుతామని ప్రకటించారు.
న్యాయాధికారులను అమిత్ షా ఎలాగైనా తనవైపు తిప్పుకుంటారని ఆడియో క్లిప్లో యడ్యూరప్ప అన్న విషయాన్ని గుర్తు చేశారు కాంగ్రెస్ నేతలు. ఆడియో క్లిప్ని సుమోటోగా స్వీకరించి విచారణ చేయాలని సుప్రీంకోర్టు ప్రధాన న్యాయమూర్తి జస్టిస్ రంజన్ గొగొయ్ని కోరారు.
జేడీఎస్ ఎమ్మెల్యేలు ఒక్కొక్కరికి రూ.10 కోట్లు ఇస్తానని భాజపా రాష్ట్ర అధినేత యడ్యూరప్ప అన్న వ్యాఖ్యల ఆడియో క్లిప్ను ముఖ్యమంత్రి కుమారస్వామి శుక్రవారం విడుదల చేసిన విషయం తెలిసిందే.
" సీబీఐ, ఈడీ యడ్యూరప్పపై విచారణ చేస్తాయా? ఒకవేళ అది జరగలేదంటే కర్ణాటక ప్రభుత్వంపై జరుగుతున్న కుట్రల వెనుక నరేంద్ర మోదీ, అమిత్ షా ఉన్నారని స్పష్టమవుతుంది"
- రణ్దీప్ సుర్జేవాలా, కాంగ్రెస్ అధికార ప్రతినిధి
రాష్ట్ర ప్రభుత్వాన్ని కేంద్రం అస్థిరపరుస్తోందని ఆరోపించారు వేణుగోపాల్. కర్ణాటకకు చెందిన 20 మంది ఎమ్మెల్యేలను, స్పీకర్ను తమవైపునకు తిప్పుకునేందుకు భాజపా రూ.450 కోట్లు ఖర్చు చేసేందుకు సిద్ధమైందని, ఈ మొత్తం ఎలా వచ్చిందో ప్రధాని సమాధానమివ్వాలని డిమాండ్ చేశారు.
