మహారాష్ట్రలో దారుణమైన ఘటన వెలుగుచూసింది. పెళ్లై నెలరోజులైనా కాకముందే ఓ నూతన వధువు తన భర్తను గొంతునులిమి హత్యచేసింది. నవంబర్ 7న ఈ హత్య జరగగా.. పోలీసులు నిందితురాలిపై కేసు నమోదు చేసి విచారణ చేపట్టారు. ఆరు రోజుల అనంతరం పోలీసులకు ఆ నవవధువు తానే భర్తను హత్య చేసినట్లు తెలిపింది. అసలు ఏం జరిగిందంటే?
పోలీసులు తెలిపిన వివరాల ప్రకారం..
నబేకాలోని నిపాణి ప్రాంతానికి చెందిన 22 ఏళ్ల పాండురంగ రాజాభౌ చావన్కు పోలచీవడి ప్రాంతానికి చెందిన శీతల్ అనే యువతితో..అక్టోబర్ 14న వివాహం జరిగింది. అయితే నవంబర్ 7న రాత్రి 11.30 గంటల సమయంలో శీతల్ తన బెడ్ రూమ్ నుంచి బయటకు వచ్చి పాండురంగ సృహతప్పి పడిపోయాడని తన అత్తకు, బంధువులకు చెప్పింది. వెంటనే కుటుంబసభ్యులు.. పాండురంగను స్థానిక ఆస్పత్రికి తరలించారు. అయితే అప్పటికే పాండురంగ మృతి చెందాడని వైద్యులు తెలిపారు. పాండురంగ గొంతుపైన కొన్ని గాయాలు ఉన్నందున తమ కోడలే హత్య చేసి ఉంటుందని మృతుడి కుటుంబసభ్యులు అనుమానం వ్యక్తం చేశారు. దీనిపై మృతుడి తల్లి నీలాబాయి రాజాభౌ చావన్ పోలీస్స్టేషన్లో ఫిర్యాదు చేశారు. పోలీసులు శీతల్ను 6 రోజుల పాటు విచారించారు. విచారణలో పాండురంగను తానే హత్య చేసినట్లు శీతల్ తెలిపింది. తనకు పాండురంగ అంటే ఇష్టం లేనందునే హత్య చేసినట్లు వెల్లడించింది. నిందితురాలిపై పోలీసులు సెక్షన్ 302 కింద కేసు నమోదు చేసి అరెస్ట్ చేశారు.
డోర్ మీదపడి 13 ఏళ్ల బాలుడు మృతి..
చైనా డోర్ మీద పడి 13 ఏళ్ల బాలుడు మృతి చెందాడు. ఈ దారుణం పంజాబ్లో జరిగింది. రూప్నగర్ మజ్రీ కోట్లా ప్రాంతంలోని నిహాంగ్ రోడ్డులో ఆదివారం సాయంత్రం ఓ డోర్ ఎగురుకుంటూ వచ్చి.. గుల్హాన్స్ అనే 13 ఏళ్ల బాలుడిపై పడింది. దీంతో బాలుడు గొంతుపై తీవ్రంగా గాయమైంది. వెంటనే బాలుడ్ని ఆస్పత్రికి తరలించారు. అక్కడ గుల్హాన్స్ పరిస్థితి విషమించగా.. చండీగఢ్లోని మరో ఆస్పత్రికి తరలించారు. అయితే.. గుల్హాన్స్కు గొంతుపై తీవ్రంగా గాయమై.. అధిక రక్తస్రావం అయినందున చికిత్స పొందుతూ మృతి చెందాడు. దీనిపై మృతుడి కుటుంబ సభ్యులు ప్లాస్టిక్ డోర్లను నిషేధించాలని.. పంజాబ్ ప్రభుత్వాన్ని డిమాండ్ చేస్తున్నారు. ఇకపై వాటి ద్వారా మరొకరికి హాని కలగకుండా చూడాలని కోరారు.
దుకాణదారుడి హత్య..
ఉత్తర్ప్రదేశ్లో ఓ దుకాణదారుడు హత్యకు గురైయ్యాడు. తన ఇంట్లో ఉన్న ఫ్రిజ్లో శవమై కనిపించాడు. దీనిపై మృతుడి కుటుంబ సభ్యులు పోలీసులకు ఫిర్యాదు చేశారు. ఈ హత్యకు సంబంధించి అన్ని కోణాల్లోనూ పోలీసులు దర్యాప్తు చేపడుతున్నామని తెలిపారు.
పోలీసులు తెలిపిన వివరాల ప్రకారం..
కాన్పుర్లోని ఖండేశ్వర్ గ్రామానికి చెందిన 52 ఏళ్ల కుబేర్ సింగ్ అనే వ్యక్తి హత్యకు గురయ్యాడు. కుబేర్ భార్య 15 ఏళ్ల క్రితం మరణించింది. ఇటీవల కుమారైకు వివాహం జరిపించాడు. ప్రస్తుతం తన మేనల్లుడితో ఉంటున్నాడు. అయితే తన మేనల్లుడు ఉద్యోగ రీత్యా ఎక్కువ రోజులు బయటనే ఉంటాడు. కుబేర్ గత నాలుగు రోజులుగా తన దుకాణం తెరవలేదు. ఇంటి వద్ద కూడా కనిపించనలేదు. గ్రామస్థులు అతని కుటుంబ సభ్యులకు సమాచారం అందించారు. వెంటనే కుబేర్ కుటుంబీకులు ఇంటిని చేరుకుని పరిశీలించగా ఫ్రిజ్లో మృతదేహం కనిపించింది. వారు పోలీసులకు ఫిర్యాదు చేశారు.
