తిహాడ్ జైలులో ఉన్న దిల్లీ మంత్రి సత్యేందర్ జైన్‌కు సంబంధించి మరో వీడియో బయటకు వచ్చింది. ఇప్పటికే సత్యేందర్ జైన్ మసాజ్ చేయించుకుంటున్నట్లు, ఆహారం తీసుకుంటున్న వీడియోలు ఆమ్‌ఆద్మీ పార్టీని ఇరకాటంలో పెట్టాయి. తాజాగా జైలు అధికారులతో ఆయన కాలక్షేపానికి సంబంధించిన వీడియో కూడా లీక్ అయింది. దీంతో ఆమ్‌ ఆద్మీ పార్టీ మరింత ఇబ్బందుల్లో పడింది.
తన సెల్‌లో జైలు సూపరింటెండెంట్‌తో సత్యేంద్ర జైన్ మాట్లాడుతున్నట్లు ఉన్న ఒక వీడియో బయటకు వచ్చింది. ఈ వీడియోను కొందరు భాజపా నేతలు సామాజిక మాధ్యమాల్లో షేర్‌ చేశారు. ఇప్పటికే సత్యేంద్ర జైన్‌కు జైలులో ప్రత్యేక సదుపాయాలు కల్పించినందుకు తిహాడ్ కారాగారం కాంప్లెక్స్‌లోని జైలు నంబర్‌-7 సూపరింటెండెంట్‌ సస్పెన్షన్‌కు గురయ్యారు.
మనీలాండరింగ్‌ కేసులో మే 31వ తేదీ నుంచి సత్యేంద్ర జైన్ తిహాడ్ జైలులో ఉన్నారు. నిబంధనలకు విరుద్ధంగా జైలులో సత్యేంద్ర జైన్ రాజభోగాలు అనుభవిస్తున్నారని, ఓ రేపిస్టుతో ఆయన మసాజ్ చేయించుకున్నారని ఇప్పటికే భాజపా నేతలు ఆమ్‌ఆద్మీ పార్టీపై పెద్ద ఎత్తున విమర్శలు గుప్పించారు. ఇందుకు సంబంధించిన వీడియోలు సైతం బయటకు వచ్చాయి. ఓ వీడియోలో జైన్.. మసాజ్ చేయించుకుంటున్నట్లు స్పష్టంగా తెలుస్తోంది. జైలులో బయట నుంచి తెప్పించుకున్న ఆహారం తింటున్న మరో వీడియో సైతం బయటకు వచ్చింది.
