పోస్ట్​లో ఒకేసారి 40వేలకుపైగా రాఖీలు, గ్రీటింగ్ కార్డ్​లు.. అన్నీ ఆయనకే!

సాధారణంగా దూరప్రాంతాల్లో ఉన్న సోదరులకు అక్కాచెల్లెళ్లు.. పోస్టు​లో రాఖీలు పంపిస్తుంటారు. కానీ హరియాణాలోని రోహ్​తక్​​ పోస్టాఫీసుకు అలా వచ్చిన రాఖీలతో ఉద్యోగులు నానాపాట్లు పడుతున్నారు. ఎందుకంటే ఒకే వ్యక్తికి వేలల్లో రాఖీలు వస్తున్నాయి. వాటిని పెద్దపెద్ద బస్తాల్లో నింపి ఆయనకు చేరవేస్తున్నారు. ఇంతకీ ఆయన ఎవరంటే?

Ram Rahim Singh Rakhis: కొన్ని సంవత్సరాలుగా రక్షాబంధన్​ సమయంలో హరియాణాలోని రోహ్​తక్​ పోస్టాఫీసు ఉద్యోగులు విచిత్ర సమస్య ఎదుర్కొంటున్నారు. నాలుగేళ్లుగా సునారియా జైలులో ఉన్న డేరా బాబా అలియాస్​ గుర్మీత్​ రామ్​ రహీమ్​ సింగ్​కు వేలకొలది రాఖీలను వివిధ ప్రాంతాల నుంచి ప్రజలు పంపిస్తున్నారు. వాటిని వేరు చేసి, జైలుకు తరలించలేక తపాలా ఉద్యోగులు నానాపాట్లు పడుతున్నారు. అందుకోసం ప్రత్యేకంగా ఉద్యోగులను నియమిస్తున్నారు. గతేడాది సుమారు 40 వేల రాఖీలు వచ్చాయని.. ఈ సారి పూర్తిగా లెక్కింపు జరగలేదని పోస్టాఫీస్​ ఉద్యోగులు చెబుతున్నారు.

గుర్మీత్​ రామ్​ రహీమ్​కు వచ్చిన రాఖీ పోస్టులు

"గత నాలుగేళ్లుగా ఇదే పరిస్థితి. రక్షాబంధన్​కు ఐదు రోజుల ముందు నుంచే రాఖీలు, గ్రీటింగ్​ కార్డులు వస్తున్నాయి. వాటిని ఓ లెవల్​లో పెట్టడానికి రాత్రీపగలు పనిచేయాల్సి వస్తోంది. దేశంలోని వివిధ ప్రాంతాల నుంచి రామ్​ రహీమ్​ పేరుతో పోస్టులు తెగ వస్తున్నాయి. ఈ సంవత్సరం ఇప్పటికే ఎనిమిది బస్తాల రాఖీలు వచ్చాయి. ఆటోలో తీసుకెళ్లి కొన్ని రాఖీల బస్తాలను జైలుకు తరలించాం. రక్షాబంధన్​ అయ్యాక కూడా పదిహేను రోజుల వరకు వస్తూనే ఉంటాయి. గతేడాది 40,000 రాఖీలు వచ్చాయి. ఈ సారి మరిన్ని ఎక్కువగా వస్తాయని అంచనా వేస్తున్నాం.

-- అజ్మీర్​ సింగ్, తపాలా శాఖ ఉద్యోగి

పోస్టులో వచ్చిన రాఖీలు, గ్రీటింగ్ కార్డులు

1,540 మంది అక్కాచెల్లెళ్లు ఉన్న సోదరుడు..
సాధారణంగా మనలో చాలామందికి ఒకరు లేదా ఇద్దరు.. మహా అయితే పది మంది వరకు అక్కాచెల్లెళ్లు ఉంటారు. రక్షా బంధన్​ నాడు వారంతా వచ్చి రాఖీలు కట్టి తమ ప్రేమను చూపిస్తారు. కానీ సూరత్​కు చెందిన చిరాగ్​ దోషి అనే ఓ వ్యక్తికి మాత్రం 1,540 మంది సోదరీమణులు ఉన్నారు. వారందరూ ఏటా రక్షాబంధన్​ రోజు చిరాగ్​కు రాఖీలు కడతారు. అందుకు ఒక్క రోజు సమయం సరిపోదని.. అతడు​ ఏకంగా వారం రోజులపాటు రక్షాబంధన్​ వేడుకలను జరుపుకుంటాడు.

అక్కాచెల్లెళ్లతో చిరాగ్​ దోషి

"నాకు దాదాపు 1540 మంది సోదరీమణులు ఉన్నారు. కేవలం గుజరాత్​లోనే కాకుండా ఇతర రాష్ట్రాల్లోనూ ఉన్నారు. వారందరూ నాకు కొత్త శక్తిని ఇస్తారు. దీంతో ప్రజలకు మరింతగా సేవ చేయాలనే ఉత్సాహం వస్తోంది. రాబోయే రోజుల్లో నా అక్కాచెల్లెళ్ల సంఖ్య 2100కు చేరబోతుంది. క్యాన్సర్​, హెచ్ఐవీ బారిన పడిన వారు కూడా వచ్చి నాకు రాఖీలు కడతారు" అంటూ చిరాగ్​ చెప్పుకొచ్చాడు. అయితే చిరాగ్​ లాంటి సోదరుడు తమకు దొరకడం అదృష్టమని అంటున్నారు అతడి సోదరీమణులు. ఎలాంటి వారికైనా సహాయం చేయడంలో చిరాగ్​ ముందుంటాడని చెబుతున్నారు.

ఇవీ చదవండి: స్వీపర్లు, ప్యూన్​ల పిల్లలతో మోదీ రాఖీ వేడుకలు

ఈ రాఖీ గిఫ్ట్‌లతో అక్కాచెల్లెళ్లకు 'రక్ష'గా నిలుద్దాం!