అసోంలోని కలియాబోర్లో ఘోర రోడ్డు ప్రమాదం జరిగింది. కారును ఓ ట్రక్కు ఢీకొట్టింది. ఈ ఘటనలో ఐదుగురు యువకులు మృతిచెందారు. వీరందరూ పెళ్లికి వెళ్లి వస్తుండగా సోమవారం అర్ధరాత్రి ఈ దుర్ఘటన జరిగింది. వెంటనే ట్రక్కు డ్రైవర్ ఘటనాస్థలి నుంచి పరారయ్యాడు. మృతులను వివేక్ దాస్, సమీర్ పాల్, వికాస్ శర్మ, సందీప్ కుమార్, సంజయ్ దాస్గా పోలీసులు గుర్తించారు. మృతులందరూ గోలాఘాట్ జిల్లాలోని బోఖాఘట్కు చెందినవారని తెలుస్తోంది.
ట్యాక్సీ బోల్తాకొట్టి..
ఉత్తర్ప్రదేశ్ లఖింపుర్ ఖేరీలో ఘోర రోడ్డు ప్రమాదం జరిగింది. రోడ్డుపై వెళ్తున్న ఓ ట్యాక్సీ బోల్తా కొట్టి కాలువలో పడిపోయింది. ఈ ప్రమాదంలో ఐదుగురు మరణించగా.. మరో ఐదుగురు తీవ్రంగా గాయపడ్డారు. ఘటనాస్థలికి చేరుకున్న పోలీసులు.. క్షతగాత్రులను ఆస్పత్రికి తరలించారు. ప్రమాద సమయంలో వాహనంలో మొత్తం 12 మంది ఉన్నట్లు పోలీసులు తెలిపారు. సోమవారం ఉదయం 5 గంటలకు జరిగిందీ ఘటన.
ప్రమాదానికి గల కారణాలను తెలుసుకునేందుకు పోలీసులు ప్రయత్నిస్తున్నారు. ఘటనపై సమాచారం అందుకున్న గ్రామస్థులు, పోలీసులు సహాయక చర్యల్లో పాల్గొన్నారు. జేసీబీ సహాయంతో ట్యాక్సీని బయటకు తీశారు పోలీసులు. ప్రమాదానికి గురైన కారుపై ఉత్తర్ప్రదేశ్ నంబర్ ప్లేటు ఉందని వెల్లడించారు. అలాగే మృతుల్లో ఇద్దరు ఉపాధ్యాయులు ఉన్నారని తెలిపారు. డ్రైవర్ నిద్రలో ఉండడం వల్లే ఈ ప్రమాదం జరిగినట్లు తెలుస్తోంది.
