ప్రముఖ తెలుగు దర్శకుడు ఎస్ఎస్ రాజమౌళి ఎన్నికల ఐకాన్గా నియమితులయ్యారు. కర్ణాటకలోని రాయచూర్ జిల్లాకు.. ఆయన ఎన్నికల ప్రచారకర్తగా వ్యవహరించనున్నారు. రాజమౌళిని రాయచూర్ జిల్లా ఎన్నికల ప్రచారకర్తగా నియమించినట్లు రాష్ట్ర ఎన్నికల సంఘం గురువారం తెలిపింది. 2023 కర్ణాటకలో జరగనున్న అసెంబ్లీ ఎన్నికల్లో భాగంగా.. రాష్ట్ర ఎన్నికల సంఘం ఈ నిర్ణయం తీసుకుంది. జిల్లాలోని ఓటర్లలందరూ ఎన్నికల్లో ఓటు హక్కును వినియోగించుకునే విధంగా రాజమౌళి అవగాహన కల్పిస్తారని వెల్లడించింది. రాయచూర్ జిల్లా కలెక్టర్ చంద్రశేఖర్ కూడా ఇదే విషయాన్ని ప్రకటించారు.
రాజమౌళి.. రాయచూర్ జిల్లా, మానవి తాలుకాలోని అమరేశ్వర్ క్యాంప్కు చెందినవారు. ఆ తర్వాత ఆయన కుటుంబం తెలుగు రాష్ట్రాల్లో స్థిరపడింది. అందుకే రాయచూర్ కలెక్టర్ చంద్రశేఖర్ ఈ నిర్ణయం తీసుకున్నారు. "పలు విజయవంతమైన సినిమాలు తీసిన రాజమౌళి.. దేశంలోని చాలా మందికి సుపరిచితమే. అందుకే రాజమౌళికి ఈ బాధ్యతలకు అప్పగిస్తున్నాం. ప్రజలు ఆయనను సులువుగా గుర్తిస్తారు. రాజమౌళి ప్రచారం చేస్తే ఓటింగ్ శాతం పెరిగే అవకాశం ఉంది. రాయచూర్ జిల్లా ఎన్నికల ఐకాన్గా ఉండేందుకు రాజమౌళి కూడా అంగీకరించారు" అని కలెక్టర్ చంద్రశేఖర్ తెలిపారు.
ఎన్నికల ప్రచారకర్తల విధులు..
ఎన్నికల ఐకాన్గా నియమితులైన వ్యక్తులు.. ఓటర్లలో అవగాహన కల్పిస్తారు. ఎన్నికల కమిషన్ సూచించిన విధంగా ప్రజలకు సందేశాన్ని అందిస్తారు. వీడియోలు, ఇతర మాధ్యమాల రూపంలో ప్రజలకు చైతన్యం కల్పిస్తారు. ఈ సందేశాలు, చేసే ప్రచారం ఏ పార్టీకి అనుకూలంగా ఉండవు. కేవలం ప్రజలకు ఓటు హక్కుపై అవగాహన మాత్రమే వీరు కలిగిస్తారు. ఎన్నికల ప్రచారకర్తలుగా దేశంలో పేరొందిన వారిని నియమిస్తూ ఉంటారు.
రాజమౌళి-ఆర్ఆర్ఆర్..
దర్శకధీరుడు రాజమౌళి తెరకెక్కించిన ఆర్ఆర్ఆర్ 2022లో విడుదలై ప్రపంచవ్యాప్తంగా బిగ్గెస్ట్‌ బ్లాక్‌ బస్టర్‌గా నిలిచింది. ఎన్టీఆర్‌ - రామ్‌చరణ్‌ ప్రధాన పాత్రలు పోషించిన ఈ సినిమా దాదాపు రూ.1200కోట్ల వరకు వసూలు చేసింది. ఇకపోతే ఈ చిత్రానికి ఇప్పటికే పలు అవార్డులు రాగా.. ఇటీవలే 'నాటు నాటు' సాంగ్కు గోల్డెన్‌ గ్లోబ్‌ అవార్డు వరించింది. ఇక క్రిటిక్స్ ఛాయిస్ అవార్డ్స్లో రెండు పురస్కారాలను దక్కించుకుంది. 'ఆర్ఆర్ఆర్' ఆస్కార్ బరిలో నిలించింది.
2020లో 'పంజాబ్ ఎన్నికల ఐకాన్'గా సోనూసూద్..
ప్రముఖ నటుడు సోనూసూద్ను కూడా 2020లో 'పంజాబ్ ఎన్నికల ఐకాన్'గా నియామకం అయ్యారు. ఆయనను పంజాబ్ ఐకాన్గా నియమిస్తూ ఉత్తర్వులు జారీ చేసింది రాష్ట్ర ఎన్నికల కమిషన్. అప్పటి పంజాబ్ రాష్ట్ర ఎన్నికల అధికారి ఎస్. కరుణ రాజు సోనూసూద్ను 'పంజాబ్ ఎన్నికల ఐకాన్'గా నియమిస్తు నిర్ణయం తీసుకున్నారు. పంజాబ్ మోగా జిల్లాకు చెందిన సోనూసూద్ లాక్ డౌన్ సమయంలో వలసకూలీలను ప్రత్యేక బస్సుల్లో ఇళ్లకు చేర్చి, వారి పాలిట ఆపద్బాంధవుడిగా మారారు. మానవత్వాన్ని చాటుకొని అన్ని వర్గాల ప్రజలకు చేరువయ్యారు.
