పార్లమెంట్లో ప్రతిష్టంభన నేపథ్యంలో కాంగ్రెస్ అగ్రనేత రాహుల్ గాంధీ విపక్ష పార్టీల నేతలతో కీలక సమావేశానికి పిలుపునిచ్చారు. దిల్లీలోని కాన్స్టిట్యూషన్ క్లబ్లో అల్పాహార విందుకు విపక్ష నేతలను ఆహ్వానించారు. మంగళవారం ఈ సమావేశం జరగనుంది.
పెగసస్ నిఘా వ్యవహారంపై సంయుక్త వ్యూహాన్ని రచించేందుకు ఈ సమావేశం ఏర్పాటు చేస్తున్నారని సంబంధిత వ్యక్తులు తెలిపారు. వీటితో పాటు ఎన్డీఏ సర్కారును ఇరుకున పెట్టేందుకు వివిధ అంశాల్లో విపక్షాలను ఏకతాటిపైకి తెచ్చేలా చర్చలు జరపనున్నట్లు చెప్పారు.
ఈ భేటీకి అన్ని విపక్ష పార్టీల ఎంపీలు, ఫ్లోర్ లీడర్లను ఆహ్వానించారు. రాహుల్ గాంధీ నిర్వహిస్తున్న అన్ని సమావేశాలకు గైర్హాజరు అవుతున్న టీఎంసీకి సైతం ఆహ్వానం అందించినట్లు సంబంధిత వర్గాలు తెలిపాయి.
పార్లమెంట్లో రగడ
పెగసస్, ధర పెరుగుదల, సాగు చట్టాలు సహా వివిధ సమస్యలపై చర్చించాలని విపక్ష పార్టీలు పార్లమెంట్లో ప్రతిరోజు డిమాండ్ చేస్తున్నాయి. వీటిపై చర్చించేందుకు వీలుగా పార్లమెంట్లో వాయిదా తీర్మానాలు ప్రవేశపెడుతున్నాయి. అయితే, మోదీ సర్కారు మాత్రం.. పెగసస్ వ్యవహారం అసలు సమస్యే కాదని చెబుతోంది. ఐటీ మంత్రి ఇప్పటికే ఉభయ సభల్లో వివరణ ఇచ్చారని స్పష్టం చేసింది. అనవసరంగా ప్రతిపక్ష పార్టీలు సభలో ఆందోళనకు దిగుతున్నాయని అంటోంది.
ఇదీ చదవండి: 'ఆగస్ట్, సెప్టెంబర్లో జోరుగా వర్షాలు!'
