Precautions to be Taken While Flying Kites : తెలుగు రాష్ట్రాల్లో సంక్రాంతి పండగ క్రేజే వేరు. ఇంటిల్లిపాదీ ఎంతో సంతోషంగా సెలబ్రేట్ చేసుకుంటారు. డూడూ బసవన్న ఆటలు, హరిదాసుల కీర్తనలు, రంగవల్లులు, గొబ్బెమ్మలు, పిండివంటలు, కొత్తబట్టలు, కొత్త అల్లుళ్ల సందళ్లు.. ఇలా చెప్పుకుంటూ పోతే అబ్బో చాలానే ఉన్నాయి. అయితే.. సంక్రాంతి పండగలో గాలిపటాలకు ఉండే క్రేజే వేరు. పిల్లల కోటాలోకి వచ్చే ఈ సంబరాల్లో.. పెద్దలు సైతం ఉత్సాహంగా పాల్గొంటారు. పండగకు ముందునుంచే కేరింతలు కొడుతూ గాలిపటాలు ఎగరవేస్తుంటారు.
అయితే.. కైట్స్ ఎగరవేసేటప్పుడు ధ్యాసంతా దానిపైనే ఉంటుంది. ఎంత ఎత్తులో ఎగురుతోంది? ఎటువైపు తిప్పాలి? అంటూ పూర్తిగా దృష్టిమొత్తం ఆకాశంలో ఉన్న పతంగి మీదనే పెడతారు. ఈ సమయంలో అడుగు ఎటు పడుతోంది? ఎటువైపు నడుస్తున్నాం? అనే విషయాలు కూడా గుర్తించలేరు. ఎదురయ్యే ప్రమాదాలను కూడా పట్టించుకోలేని స్థితిలో ఉంటారు. ముఖ్యంగా చిన్నపిల్లలు మరింత అజాగ్రత్తగా ఉంటారు. దీంతో ఊహించని విధంగా ప్రమాదంలో చిక్కుకునే అవకాశం ఉంటుంది. కాబట్టి.. పిల్లలు ఆడుకుంటున్నప్పుడు పెద్దలు వాళ్లను ఓ కంట కనిపెడుతుండాలి. ఈ కింది జాగ్రత్తలు తీసుకోవాలి.
హలో పిల్లలూ.. ఈ పతంగుల కథ మీకూ తెలుసా..!
ప్లాస్టర్‌ చుట్టుకోవాలి: గాలిపటాలు ఎగరవేసే సమయంలో వేళ్లకు ప్లాస్టర్‌ చుట్టుకోవాలి. దీని వల్ల మాంజా పూసిన దారం వల్ల చేతివేళ్లు తెగకుండా ఉంటాయి. అంతేకాదు.. ఒక్కోసారి గొంతు కూడా తేగే ప్రమాదం ఉంటుంది. కాబట్టి.. చాలా అప్రమత్తంగా ఉండాలి. ఏదైనా ప్రమాదం జరిగి రక్తస్రావం జరిగితే, గాయాన్ని శుభ్రంగా కడగాలి. రక్తస్రావం ఆగేందుకు బ్యాండేజితో కట్టేసి, సమీపంలోని ఆసుపత్రికి తీసుకెళ్లాలి. ముఖ్యంగా గాలిపటాలను ఇతరులకు ఇబ్బంది లేకుండా మైదాన ప్రాంతాల్లో ఎగరవేయడమే మేలు.
మిద్దెలు ఎక్కక పోవడమే ఉత్తమం: గాలిపటాలు బాగా ఎత్తున ఎగరాలని చాలా మంది సమీపంలోని డాబాలు, ఎతైన గోడలపైకి ఎక్కుతారు. ఇలా ఎత్తైన ప్రదేశాల్లో గాలిపటాలను ఎగరేయడం చాలా ప్రమాదం. పతంగులను పైకి ఎక్కించే క్రమంలో ప్రమాదవశాత్తు జారి కింద పడే అవకాశం ఉంటుంది. కాబట్టి ఎత్తైన ప్రదేశాల్లో గాలిపటాలు ఎగరవేయడం మానుకోవాలి.
ఈ సంక్రాంతికి.. పతంగులతో పాటు.. పక్షులనూ ఎగరనిద్దం
విద్యుత్ తీగలున్న చోట వద్దు: నగరాల్లో విద్యుత్ తీగలు ఇళ్ల పక్కనుండే వెళ్తాయి. కొన్నిసార్లు చేత్తో పట్టుకుంటే అందేలా ఉంటాయి. ఇలాంటి ఇళ్లపైన గాలిపటాలు ఎగరేయడం అత్యంత ప్రమాదం. మరికొన్నిసార్లు గాలిపటాలు విద్యుత్ వైర్లకు చిక్కుకుంటాయి. పిల్లలకు తెలియక వాటిని కర్రలతో తీసుకునే ప్రయత్నం చేస్తారు. దీనివల్ల షార్ట్‌సర్క్యూట్‌ జరిగే ప్రమాదం ఉంది. కాబట్టి ఇలాంటి చోట అసలు గాలిపటాలు ఎగరేయవద్దు.
రోడ్ల మీదా వద్దు: ఇక మరికొందరు గాలిపటాలు ఎగరేయడానికి చోటు లేదంటూ.. రోడ్ల మీదనే ఇష్టారీతిన తిరుగుతూ ఎగరవేస్తారు. వచ్చిపోయే వాహనాలను కూడా పట్టించుకోరు. దీంతో ప్రమాదాలకు గురయ్యే ఛాన్స్ ఎక్కువ. కాబట్టి.. రోడ్ల మీద అస్సలే ఎగరేయ కూడదు. కాస్త దూరమైనా ఎవరూ లేని ప్రదేశాలు, స్కూల్ గ్రౌండ్లలోకి వెళ్లి ఎగరవేసుకోవడం ఉత్తమం.
చైనా మాంజాలు వద్దు: పతంగులను చాలా ఎత్తులోకి ఎగరవేయాలనే ఉద్దేశంతో చాలా మంది చైనా మాంజాలను ఉపయోగిస్తారు. ఈ మాంజా మంచిది కాదు. ఈ మాంజాలు వాహనాలపై వెళ్తున్నవారి మెడకు చుట్టుకు ప్రాణాలు కోల్పోయినవారు ఎంతో మంది ఉన్నారు. చాలా పక్షులు కూడా ఇలాగే చనిపోతున్నాయి. కాబట్టి ఇలాంటి ప్రమాదకర మాంజా బదులు సంప్రదాయ దారం వాడండి మంచిది.
