సాంకేతికతను ఉపయోగించుకుని పాలనను కొత్త పుంతలు తొక్కించేలా ప్రధానమంత్రి నరేంద్ర మోదీ కీలక నిర్ణయం తీసుకున్నారు. ప్రస్తుతం ఉన్న మంత్రి మండలిలో (Council Of Ministers India) 77 మంది మంత్రులను 8 గ్రూపులుగా విభజించనున్నారు. ప్రతి గ్రూప్లోనూ కొంతమంది నైపుణ్యం కలిగిన యువకులను, రిటైర్డ్ అధికారులను నియమించనున్నారు. వీరి నుంచి సలహాలను తీసుకొని మెరుగైన విధానాలను రూపొందించి అమలు చేయనున్నారు. మంత్రుల కార్యాలయాల్లో మరింత పారదర్శకతను పెంపొందిచే దిశగా ఈ నిపుణుల బృందం ఇంకా ఎక్కువ మందిని నియమించకుకోనున్నట్లు సంబంధిత వర్గాలు తెలిపాయి.
మంత్రి మండలిని మొత్తం ఎనిమిది గ్రూపులుగా విభజించే కసరత్తు అంతా ప్రధానమంత్రి నరేంద్ర మోదీ అధ్యక్షతన జరిగింది. 'చింతన్ శివిర్' పేరుతో నిర్వహించిన ఈ సమావేశాలు ఒక్కొక్కటి దాదాపు ఐదు గంటల పాటు జరిగాయి. వీటిలో వ్యక్తిగత సామర్థ్యం, సమర్థవంతమైన అమలు, మంత్రిత్వ శాఖ పనితీరు, పార్టీ సమన్వయం, నైపుణ్యాలు పెంపొందించే విధానాలు, అనుసరించాల్సిన పార్లమెంటరీ పద్ధతులపై చర్చించారు. ఈ సమావేశాలకు పార్లమెంట్ ఉభయ సభాధిపతులు హాజరయ్యారు.
సమస్యలను ఎదుర్కోవడం, సమయ పాలన వంటి విషయాలపై అవగాహన కల్పించేందుకు ఈ నిర్ణయం తీసుకున్నట్లు అధికార వర్గాలు తెలిపాయి. సమయాన్ని సద్వినియోగం చేసుకుంటూ.. పాలనలో వేగం పెంచేందుకు ఈ బృందాలు ఉపయోగపడుతాయని పేర్కొన్నాయి.
ఇదీ చూడండి: భారత్కు త్వరలోనే ఎస్-400 క్షిపణులు
