'శాస్త్రవేత్తల అనుమతి లభించిన వెంటనే వ్యాక్సినేషన్​'

కొవిడ్  పరిస్థితులపై చర్చించేందుకు వివిధ రాజకీయ పార్టీల నేతలు, కేంద్ర మంత్రులతో ప్రధాని నరేంద్ర మోదీ ఇవాళ వర్చువల్‌గా భేటీ అయ్యారు. ఈ సమావేశంలో అన్ని రాజకీయ పార్టీలకు చెందిన పార్లమెంటరీ పార్టీ నేతలు పాల్గొన్నారు. కొవిడ్ వ్యాక్సిన్ ఎప్పుడు అందుబాటులోకి వస్తుంది, వ్యాక్సిన్ సరఫరాపై ప్రభుత్వం సన్నద్ధత గురించి రాజకీయ పార్టీలు వాకబు చేసినట్లు సమాచారం.

కరోనా టీకా వినియోగానికి శాస్త్రవేత్తల అనుమతి లభించిన వెంటనే.. వ్యాక్సినేషన్​ కార్యక్రమాన్ని ప్రారంభిస్తామని ప్రధాని నరేంద్ర మోదీ వెల్లడించారు. కరోనా పరిస్థితులు, వ్యాక్సిన్​ పంపిణీపై చర్చించేందుకు వర్చువల్​గా ఏర్పాటు చేసిన అఖిలపక్ష భేటీలో మోదీ.. ఈ మేరకు స్పష్టం చేశారు. వివిధ పార్టీలకు చెందిన నేతలు ఈ సమావేశంలో పాల్గొన్నారు.

కొవిడ్​-19 వ్యాక్సిన్​ వచ్చేందుకు ఇక ఎంతోకాలం పట్టదని, కొన్నివారాల్లోనే సిద్ధం అవుతుందని నిపుణులు చెప్పినట్లు మోదీ తెలిపారు.

"వ్యాక్సిన్​ టీకా ధరపై నిర్ణయం తీసుకునేందుకు రాష్ట్ర ప్రభుత్వాలతో కేంద్రం చర్చిస్తోంది. ప్రజా ఆరోగ్యమే అన్నింటికన్నా ముఖ్యం. ధర నిర్ణయంలో అదే మా తొలి ప్రాధాన్యం. కేంద్ర, రాష్ట్ర ప్రభుత్వాలు టీకా పంపిణీకి పనిచేస్తున్నాయి. ఇతర దేశాలతో పోలిస్తే వ్యాక్సిన్​ సామర్థ్యం, పంపిణీ విషయంలో మన దేశం ముందంజలో ఉంది. వ్యాక్సిన్​ రంగంలో మనకు చాలా అనుభవం ఉంది. కొద్ది వారాల్లోనే వ్యాక్సిన్​ అందుబాటులోకి వస్తుందని నిపుణులు అంటున్నారు. వారు గ్రీన్​ సిగ్నల్​ ఇచ్చిన వెంటనే పంపిణీ ప్రారంభిస్తాం.

వ్యాక్సిన్​ సామర్థ్యంపై మన శాస్త్రవేత్తలు అపారమైన విశ్వాసం ప్రకటించారు. ప్రపంచం మొత్తం ఇప్పుడు భారత్​వైపే చూస్తోంది. చౌకగా వ్యాక్సిన్​ అందించగలిగే సామర్థ్యం భారత్​కే ఉంది. మీ విలువైన సూచనలు, సలహాలను లిఖిత పూర్వకంగా ప్రభుత్వానికి అందజేయాలని అన్ని పార్టీల నేతలను నేను కోరుతున్నాను. మీ సలహాలకు ప్రాధాన్యం ఉంటుందని నేను హామీ ఇస్తున్నాను."

- నరేంద్ర మోదీ, ప్రధాని

కరోనా టీకాను తొలుత కోటి మందికిపైగా ఆరోగ్య సిబ్బందికి ఇవ్వాలని కేంద్రం భావిస్తోంది. ఆ తర్వాత కొవిడ్ పోరులో ముందుండి పోరాడుతున్న వారికి ప్రాధాన్యం ఇవ్వాలని యోచిస్తోంది. ఈ మేరకు ఇప్పటికే మోదీ సర్కార్​.. అన్ని పార్టీలకు తెలియజేసినట్లు సమాచారం.

తొలుత వీరికే..

వైద్యులు, నర్సులు సహా కోటి మందికిపైగా ఆరోగ్య కార్యకర్తలకే తొలుత టీకా అందించనున్నారు. అనంతరం దాదాపు రెండు కోట్ల మంది పోలీసులు, సైనికులు, మున్సిపల్​ సిబ్బందికి ఇస్తారు.

ఎవరెవరు వచ్చారు..?

1. ఐదు లేదా అంతకన్నా ఎక్కువ ఎంపీలు ఉన్న ప్రముఖ రాజకీయ పార్టీల నుంచి 13 మంది నేతలు ఈ భేటీలో పాల్గొన్నారు.
2. రాజ్యసభలో ప్రతిపక్షనేత అయిన గులాం నబీ ఆజాద్​ సమావేశంలో కొవిడ్​ టీకా పంపిణీపై ప్రధానికి పలు సూచనలు చేసినట్లు సమాచారం.
3. టీఎంసీ నుంచి సుదీప్​ బంధోపాధ్యాయ్​, ఎన్​సీపీ నుంచి శరద్​ పవార్​, తెరాస​ నుంచి నామా నాగేశ్వరరావు, శివసేన నుంచి వినాయక్​ రౌత్​ సహా పలువురు సమావేశంలో తమ అభిప్రాయాలను వ్యక్తం చేసినట్లు తెలుస్తోంది.
4. రక్షణ మంత్రి రాజ్​నాథ్​ సింగ్, హోం మంత్రి అమిత్​ షా, ఆరోగ్య మంత్రి హర్షవర్ధన్​ కూడా భేటీలో ఉన్నారు. వీరితో పాటు పలువురు కేంద్రమంత్రులు హాజరయ్యారు.
5. కరోనా మహమ్మారి వ్యాప్తి ప్రారంభమయ్యాక కొవిడ్ పరిస్థితులపై చర్చించేందుకు ప్రధాని అఖిలపక్ష సమావేశాన్ని నిర్వహించడం ఇది రెండోసారి.

కలిసి పనిచేయాలి: ఆజాద్​

కరోనా లాంటి మహమ్మారులు దేశ అంతర్గత భద్రతకు ముప్పుగా పరిణమిస్తాయని అఖిల పక్ష భేటీలో వ్యాఖ్యానించారు కాంగ్రెస్​ సీనియర్​ నేత గులాం నబీ ఆజాద్​. ఆ సవాలును స్వీకరించాలని అన్నారు. కొవిడ్​ వ్యాక్సిన్​ను భారత్​ సరసమైన ధరలకు కొనుగోలు చేయాలని కోరారు. టీకాతో దీర్ఘకాల ప్రతికూల ప్రభావం పడుతుందా అనే అంశంపై పర్యవేక్షణ ఉండాలని అభిప్రాయపడ్డారు.

శాస్త్రవేత్తలు, విధాన నిర్ణేతలు, రాజకీయ నేతలు.. వ్యాక్సిన్​ ప్రాధాన్యం, పంపిణీపై కలిసి పనిచేయాలని కోరారు ఆజాద్​.