టికెట్ లేకుండా రైలు ఎక్కే వాళ్లు సహజం. కానీ రైలు ఎక్కకుండానే టికెట్ కొనేవాళ్లను చూశారా..? ఇదేంటి టికెట్ కొని ప్రయాణం చేయకుండా ఎందుకు ఉంటారు అని ఆలోచిస్తున్నారా? దీని వెనుక ఓ పెద్ద స్టోరీ ఉందండి.. ఆ కథేంటో తెలుసుకుందాం పదండి..
ఉత్తర్ప్రదేశ్ ప్రయాగ్రాజ్ సమీపంలో దయాల్పుర్ అనే రైల్వే స్టేషన్ ఉంది. దీనిని స్వాతంత్ర్యం వచ్చాక ఆనాటి ప్రధానమంత్రి పండిత్ జవహర్లాల్ నెహ్రూ, రైల్వే మంత్రి లాల్బహుదుర్ శాస్త్రి ప్రతిపాదనల మేరకు 1954లో నిర్మించారు. ఆ తర్వాత కొన్ని దశాబ్దాల పాటు అనేక మంది ప్రయాణికులు ఈ స్టేషన్ను నుంచి రాకపోకలు సాగించారు. కానీ కొన్నేళ్ల తర్వాత స్టేషన్కు ఆదాయం రావడం తగ్గిపోయింది. దీంతో 2006 ఈ స్టేషన్ను మూసివేశారు ఉత్తర మండల రైల్వే అధికారులు. తమ గ్రామంలో రైల్వే స్టేషన్ను తిరిగి ప్రారంభించాలంటూ దయాల్పుర్ ప్రజలు కోరారు. ఎంపీ, ఎమ్మెల్యేలు, అధికారులకు అనేక వినతి పత్రాలు ఇచ్చారు. అనేక సంవత్సరాల పోరాటం అనంతరం 2022 జనవరి ఈ స్టేషన్ను తిరిగి ప్రారంభించారు రైల్వే అధికారులు. తమ గ్రామంలో రైల్వే స్టేషన్ ప్రారంభం అయినందుకు సంతోషం వ్యక్తం చేశారు గ్రామస్థులు.
స్టేషన్ తిరిగి ప్రారంభించిన కొత్తలో టికెట్లు బాగానే అమ్ముడుపోయాయి. ఆ తర్వాత కొన్ని రోజులకు టికెట్ అమ్మకాలు పడిపోయాయి. ఇన్నేళ్లు కష్టపడి.. తిరిగి తెరిపించుకున్న రైల్వే స్టేషన్ మళ్లీ మూతపడితే ఎలా అన్న సందేహం వారిలో మొదలైంది. స్టేషన్ మూతపడకుండా ఉండేందుకు పరిష్కారం కోసం అంతా ఆలోచించారు. అందుకోసమే స్టేషన్ ఆదాయం పడిపోకుండా వచ్చి టికెట్లు కొని ప్రయాణించకుండా వెళ్తున్నారు గ్రామస్థులు. అలా.. 2022 డిసెంబర్ వరకు నెలకు సుమారు 700 టికెట్లు అమ్ముడుపోయాయి. కానీ ఈ ఏడాది ప్రారంభం నుంచి టికెట్ల అమ్మకాలు మళ్లీ పడిపోయాయి. దీనిని గమనించిన గ్రామస్థులు ఇప్పుడు మళ్లీ పెద్ద సంఖ్యలో టికెట్లు కొంటున్నారు. స్టేషన్ ఆదాయం తగ్గిపోయినప్పుడల్లా తాము వెళ్లి టికెట్ కొని ప్రయాణించకుండా వచ్చేస్తామని గ్రామస్థులు చెబుతున్నారు.
"మొదట రైల్వే స్టేషన్ను ప్రారంభించిన తర్వాత ఆదాయం లేక మూసివేశారు. కానీ మేము ఈ స్టేషన్ను తిరిగి తెరిపించాలి అనుకున్నాం. అందుకే ప్రయాణించకున్నా వచ్చి టికెట్లు కొంటున్నాం. గత 2-3 నెలలుగా ఇలానే కొనుగోలు చేస్తున్నాం. కేవలం మా గ్రామంలో రైల్వే స్టేషన్ కొనసాగడానికి ఇలా చేస్తున్నాం."
--గ్రామస్థుడు
"రైలు ఎక్కే ప్రతి ప్రయాణికుడు టికెట్ కొనాలి. వాటి ద్వారా వచ్చే ఆదాయంతోనే ఈ వసతులను కల్పిస్తాం. టికెట్ అమ్మాకాలు పూర్తిగా పడిపోయినప్పుడు మాత్రమే స్టేషన్ను మూసివేస్తాం. సాధారణంగా రైల్వే నిబంధనల ప్రకారం బ్రాంచ్లైన్లో ఉన్న స్టేషన్లో కనీసం 25 టికెట్లు, మెయిన్ లైన్లో ఉన్న స్టేషన్లో కనీసం 50 టికెట్లు అమ్ముడుపోవాలి. ఒక స్టేషన్లో రైలు హాల్టింగ్ నిర్ణయం లాగే.. స్టేషన్ మూసివేతపై నిర్ణయం పూర్తిగా రాష్ట్ర స్థాయి అధికారులకే ఉంటుంది."
--హెచ్ఎస్ ఉపాధ్యాయ్, పబ్లిక్ రిలేషన్స్ ఆఫీసర్, ఉత్తర మండల రైల్వే
ఇవీ చదవండి : రెండు చేతులతో వేర్వేరు భాషలు రాస్తున్న యువతి.. ప్రపంచ రికార్డులు దాసోహం
ప్రేమకు నో చెప్పిన లేడీ లాయర్.. కోపంతో ముక్కు కొరికిన న్యాయవాది.. విమెన్స్ డే సెలెబ్రేషన్స్లోనే..
