A child named as a Border: ప్రముఖ పుణ్యక్షేత్రాలు, ప్రాంతాల పేర్లను పిల్లలకు పెట్టటం తెలిసిందే. అయితే, ఓ పిల్లవాడికి భారత్-పాక్ 'బార్డర్'గా నామకరణం చేశారు తల్లిదండ్రులు. ఈ సంఘటన పంజాబ్లోని అట్టారీ-వాఘా సరిహద్దులో జరిగింది.
పాకిస్థాన్కు చెందిన ఓ మహిళ ఈనెల 2వ తేదీన పండంటి మగ బిడ్డకు జన్మనిచ్చారు. ఇండో-పాక్ సరిహద్దులో పుట్టిన ఆ పిల్లాడికి 'బార్డర్' అని పేరు పెట్టినట్లు తల్లిదండ్రులు నింబు బాయి, బలమ్ రామ్ తెలిపారు.
పాకిస్థాన్లోని పంజాబ్ రాష్ట్రానికి చెందిన ఈ దంపతులతో పాటు మరో 97 మంది పాకిస్థానీలు భారత్కు వచ్చారు. ఆ తర్వాత కరోనా విజృంభించటం వల్ల లాక్డౌన్ విధించటం, పాక్ సరిహద్దులు మూసివేయడం సహా సరైన పత్రాలు లేకపోవటం వల్ల అట్టారీ-వాఘా సరిహద్దుల్లోనే ఉండిపోవాల్సి వచ్చింది. ఆ సమయంలో నింబు బాయి గర్భవతి. డిసెంబర్ 2న కూలీ పనులకు వెళ్లగా పురిటి నొప్పులు ప్రారంభమయ్యాయి. సమీప గ్రామాల ప్రజలు వచ్చి పురుడు పోశారు. వైద్య సహాయం అందించారు.
మరో పిల్లాడికి 'భారత్'గా నామకరణ
రెండోవేవ్ లాక్డౌన్ కన్నా ముందు తమతో పాటు 98 మంది పాకిస్థానీ పౌరులు భారత్కు వచ్చినట్లు బలమ్ రామ్ తెలిపారు. సరిహద్దులు మూసివేయటం వల్ల ఇక్కడే చిక్కుకుపోయామని చెప్పారు. పాకిస్థానీల్లో 47 మంది పిల్లలు సైతం ఉన్నారు. అందులో ఆరుగురు భారత్లోనే జన్మించటం గమనార్హం. అంతా ఏడాదిలోపు వారే.
లాగ్యా రామ్ అనే వ్యక్తి సైతం తన కుటుంబంతో అట్టారీ సరిహద్దుల్లోనే నివసిస్తున్నారు. గత ఏడాదిలో జన్మించిన తన కుమారుడికి 'భారత్'గా పేరు పెట్టారు. జోధ్పుర్లో తన సోదరుడిని కలిసేందుకు వచ్చిన లాగ్యా రామ్ తిరిగి పాకిస్థాన్కు వెళ్లలేక అట్టారీలో ఉంటున్నట్లు చెప్పారు.
సరిహద్దులోనే ఉండేందుకు కారణం?
భారత్లో పుట్టిన పిల్లలకు పాస్పోర్టులు కావాలని సరిహద్దు అధికారులు అడుగుతున్నారని, తమ వద్ద తినేందుకే డబ్బులు లేవని వాపోతున్నారు పాకిస్థానీలు. తమతో వచ్చిన వారు సొంత దేశానికి వెళ్లిపోతుంటే తాము ఇక్కడే ఉండిపోవాల్సి వస్తోందని చెబుతున్నారు. తమను స్వదేశం పంపించేందుకు సహకరించాలని అధికారులను వేడుకుంటున్నారు.
ఇదీ చూడండి: అతడి నుంచి గిఫ్ట్గా ఖరీదైన పిల్లులు.. అందుకే ఆ నటికి ఇన్ని కష్టాలు!
