బిహార్లో ఓ దొంగల ముఠా పట్టపగలే సెల్ఫోన్ టవర్ను చోరీ చేసింది. మొబైల్ సర్వీస్ ప్రొవైడర్ అధికారులుగా నటించిన ముఠా.. సెల్ టవర్ను దొంగిలించింది. కంపెనీ నష్టాల్లో ఉందని అందుకే టవర్ తీసివేస్తున్నట్లు.. స్థల యజమానిని నమ్మించి ఈ దొంగతనానికి పాల్పడ్డారు. దీనిపై కేసు నమోదు చేసుకున్న పోలీసులు నిందితుల కోసం గాలింపు చర్యలు చేపట్టారు.
పట్నా గార్డెన్బాగ్లోని కచ్చి తలాబ్ ప్రాంతంలో ఏర్పాటు చేసిన సెల్ టవర్కు కొన్ని నెలలుగా ఆ కంపెనీ వారు అద్దె చెల్లించడం లేదు. ఈ విషయం తెలుసుకున్న 10-15 మందితో కూడిన ఓ దొంగల ముఠా టవర్ను దొంగలించడానికి ప్లాన్ చేసింది. పక్కాప్లాన్తో ఆ టవర్ ఏర్పాటు చేసిన స్థలం యజమానితో.. తాము సర్వీస్ ప్రొవైడర్ అధికారులమని.. కంపెనీ నష్టాల్లో ఉన్నందున అద్దె చెల్లించలేమని చెప్పారు. అందుకే టవర్ను తొలగించాలనుకుంటున్నట్లు చెప్పగా దానికి భూమి యజమాని అంగీకరించాడు. దీంతో ఆ ముఠా వెంటనే టవర్ను నేలమట్టం చేసింది. అనంతరం టవర్ భాగాలను అక్కడ నుంచి ఎత్తుకెళ్లింది.
అమెరికా ప్రజలను మోసం చేస్తున్న నకిలీ కాల్ సెంటర్..
అమెరికా ప్రజలను మోసం చేస్తున్న రాజస్థాన్లో ఓ నకిలీ కాల్ సెంటర్పై పోలీసులు దాడులు చేశారు. అమెజాన్ పేరుతో నడుస్తున్న ఈ కాల్ సెంటర్పై పక్కా సమాచారంలో దాడులు నిర్వహించిన పోలీసులు.. 16 మందిని అరెస్ట్ చేశారు. వీరిలో రాజస్థాన్కు చెందిన వారితో పాటు, ఈశాన్య రాష్ట్రాలకు చెందిన వారు కూడా ఉన్నట్లు గుర్తించారు.
చిత్తోర్గఢ్లోని ఓ హోటల్లో నకిలీ కాల్ సెంటర్ను నిర్వహిస్తున్నట్లు పోలీసులకు ఓ వ్యక్తి సమాచారం అందించాడు. ఈ సమాచారంతో రైడ్ నిర్వహించిన పోలీసులు.. 16 మందిని అదుపులోకి తీసుకున్నారు. అమెజాన్ పేరుతో నకిలీ కాల్ సెంటర్ను నడుపుతున్నట్లు కొన్ని పత్రాలను గుర్తించారు. ఈ కాల్ సెంటర్ ద్వారా అమెరికాలోని ప్రజలు మోసగిస్తున్నారని పోలీసులు తెలిపారు. వారి నుంచి కీలక పత్రాలు, కంప్యూటర్లు స్వాధీనం చేసుకున్నారు. దీనిపై కేసు నమోదు చేసుకుని విచారణ చేపట్టినట్లు చిత్తోర్గఢ్ స్టేషన్ ఇన్ఛార్జ్ విక్రమ్ సింగ్ తెలిపారు.
