'సల్మాన్​ సినిమాలో ఛాన్స్​ వద్దు.. పెళ్లే ముద్దు'

సినిమాల్లో నటించేందకు బాలీవుడ్​ దిగ్గజ నటుడు సల్మాన్​ ఖాన్​ నుంచి తనకు ఆహ్వానం అందిందని ఇటీవల వార్తల్లో నిలిచిన 2 అడుగుల 3 అంగుళాల పొడవు ఉండే అజీమ్​ మన్సూరీ తెలిపారు. అయితే తనకు ప్రస్తుతం పెళ్లి చేసుకునే ఆలోచన తప్ప మరేదీ లేదని చెప్పుకొచ్చారు.

పొట్టిగా ఉన్న తనకు ఎవరూ పెళ్లికి పిల్లనివ్వడం లేదంటూ... వార్తల్లో నిలిచిన అజీమ్​ మన్సూరీకి బాలీవుడ్​ నటుడు సల్మాన్​ఖాన్ నుంచి ఆహ్వానం అందిందట. సినిమాల్లో నటించేందుకు ముంబయి రావాలని సల్మాన్​ కోరినట్లు వెల్లడించారు అజీమ్. అయితే ఆ ఆహ్వానాన్ని తాను సున్నితంగా తిరస్కరించినట్లు పేర్కొన్నారు. ఇప్పుడిప్పుడే పెళ్లి సంబంధాలు వస్తున్నాయన్న మన్సూరీ.. ప్రస్తుతం తన దృష్టి వివాహం చేసుకోవడం మీద ఉన్నట్లు వివరించారు.

ఉత్తర్​ప్రదేశ్​ శామ్లీకి చెందిన 26 ఏళ్ల అజీమ్​ మన్సూరీ.. 2 అడుగుల 3 అంగుళాల పొడవు ఉంటారు. ఎన్నో సంబంధాలు వచ్చినా ఎత్తు తక్కువ ఉన్నందువల్ల పెళ్లి కుదరలేదని ఇటీవల మహిళా పోలీస్​స్టేషన్​కు వెళ్లి తన గోడు వెళ్లబోసుకున్నారు. ఆ వీడియో వైరల్​గా మారింది. అప్పటి నుంచి తనకు పెళ్లి సంబంధాలు వస్తున్నాయని చెప్పారు అజీమ్.

హనీమూన్​కు అక్కడికే...

ప్రస్తుతం ఓ దుకాణం నడుపుతున్న అజీమ్​... రంజాన్ కంటే ముందే వివాహం చేసుకోవాలని తాపత్రయపడుతున్నారు. అదే జరిగితే మొదట తన భార్యను ఉమ్రా, హజ్ యాత్రకు.. తర్వాత హనీమూన్​ కోసం గోవా, కులు మనాలి, సిమ్లాకు తీసుకువెళ్తానని అంటున్నారు.