Monsoon Kerala 2023 : భారత్లోకి రుతుపవనాల రాకపై స్పష్టత కొరవడింది. జూన్ 1నే భారత్లోకి రుతుపవనాలు ప్రవేశించాల్సి ఉండగా.. వాటి రాక ఆలస్యమైంది. జూన్ 4న దేశంలోకి రుతుపవనాలు ప్రవేశిస్తాయని.. మే నెలలో భారత వాతావరణ శాఖ అంచనా వేసింది. కానీ ఆ అంచనాలన్నీ తప్పాయి. ఇప్పుడు ఈ విషయంపై ఐఎండీ మౌనం వహిస్తోంది. తిరిగి కొత్త తేదీలను సైతం వెల్లడించలేకపోతోంది.
కాగా మంగళవారం ఐఎండీ ఓ బులెటిన్ విడుదల చేసింది. గుజరాత్‌లోని పోర్బందర్‌కు దక్షిణంగా ఆగ్నేయ అరేబియా సముద్రంలో ఏర్పడిన అల్పపీడనం.. వాయవ్య దిశగా కదిలి తుపానుగా మారే అవకాశం ఉందని తెలిపింది. గోవాకు పశ్చిమంగా నైరుతి దిశలో 920 కి.మీ, ముంబయికి నైరుతి దిశలో 1,120 కి.మీ, పోర్బందర్‌కు దక్షిణంగా 1,160 కి.మీ, పాకిస్థాన్‌లోని కరాచీకి దక్షిణంగా 1,520 కి.మీ వేగంతో అల్పపీడనం ఏర్పడిందని.. ఐఎండీ తన ఓ ప్రకటనలో వివరించింది. ఇది దాదాపుగా ఉత్తరం వైపుగా కదిలి ఆగ్నేయ అరేబియా సముద్రం మీదుగా.. వచ్చే 24 గంటల్లో తుపానుగా మారే అవకాశం ఉందని పేర్కొంది.
ఈ అల్పపీడన తీవ్రత దేశంలోకి రుతుపవనాల రాకను ప్రభావితం చేస్తుందని ఐఎండీ వెల్లడించింది. అయితే అందుకు సంబంధించిన సృష్టమైన తేదీని మాత్రం ప్రకటించలేదు. కాగా స్కైమెట్ వెదర్ అనే ఓ ప్రైవేటు సంస్థ మాత్రం జూన్ 8న లేదా 9న కేరళలోకి రుతుపవనాలు ప్రవేశిస్తాయని అంచనా వేసింది.
సాధారణంగా జూన్ 1 నుంచి ఏడు రోజుల వ్యవధిలో కేరళలోకి నైరుతి రుతుపవనాలు ప్రవేశిస్తాయి. కానీ ఈ సారి మాత్రం అలాంటి పరిస్థితులేమీ కనిపించటం లేదు. 2022లో మే 29న, 2021లో జూన్ 3, 2020లో జూన్ 1, 2019లో జూన్ 8న, 2018లో మే 29న నైరుతి రుతుపవనాలు కేరళలోకి ప్రవేశించాయి.
Kerala Monsoon Forecast 2023 : 2023లో నైరుతి రుతుపవనాల కారణంగా సాధారణ వర్షపాతం నమోదవుతుందని భారత వాతావరణ విభాగం- ఐఎండీ అంచనా వేసింది. హిందూ మహాసముద్ర ద్విధ్రువ, ఉత్తర అర్ధగోళంలోని పరిస్థితుల కారణంగా ఎల్‌నినో ఏర్పడే అవకాశం ఉందని తెలిపింది. సీజన్ ద్వితీయార్థంలో ఈ ప్రభావం కనిపించవచ్చని వెల్లడించింది. ఈ ఏడాది ఏప్రిల్లో భారత వాతావరణ శాఖ ఈ వివరాలను తెలియజేసింది.
ఐఎండీ అంచనాల ప్రకారం..
- భారత్లోని వాయవ్య, పశ్చిమ, మధ్య, ఈశాన్య ప్రాంతాల్లో సాధారణం నుంచి లోటు వర్షపాతం నమోదయ్యే అవకాశం ఉంది.
- తూర్పు భారతం, ఈశాన్య, వాయవ్య భారతంలోని కొన్ని ప్రాంతాల్లో సాధారణ వర్షపాతం ఉంటుంది.
- వర్షాకాలంలో ఎల్ నినో పరిస్థితులు ఏర్పడవచ్చు. సీజన్ ద్వితీయార్థంలో ఈ ప్రభావం కనిపించవచ్చు. పూర్తి వివరాల కోసం ఇక్కడ క్లిక్ చేయండి.
- ఇవీ చదవండి:
- ఒడిశాలో మరో రైలు ప్రమాదం.. సికింద్రాబాద్ ఎక్స్ప్రెస్లో మంటలు
- సోదరి కులాంతర వివాహం.. బైక్పై వచ్చి సినీ ఫక్కీలో ఎత్తుకెళ్లిన అన్న
