One Crore Cyber Crime: దేశంలో సైబర్ నేరగాళ్లు రెచ్చిపోతున్నారు.. వారు, వీరు అని తేడా లేకుండా అందరినీ కేటుగాళ్లు మోసం చేస్తున్నారు.. చదువుకున్న వాళ్లు, చదవురాని వాళ్లు.. ఉద్యోగులు, నిరుద్యోగులు, ఆఖరికి అధికారులు సైతం నేరగాళ్ల ఉచ్చులో చిక్కుకొని మోసపోతున్నారు. తాజాగా దిల్లీకి చెందిన ఓ వ్యక్తి.. సైబర్ మోసగాళ్ల చేతిలో మోసపోయి రూ. కోటి పోగట్టుకున్నాడు.
పోలీసుల వివరాల ప్రకారం.. కంఝవాలాలోని కరాలా గ్రామంలో షేర్ సింగ్ అనే వ్యక్తి తన కుటుంబంతో కలిసి నివసిస్తున్నాడు. 2019 అక్టోబరులో అతడికి సుష్మా తివారీ అనే ఓ యువతి కాల్ చేసింది. తాను ఐజీఎమ్ఎస్ ముంబయి నుంచి మాట్లాడుతున్నానని చెప్పింది. మాక్స్ లైఫ్ ఇన్సూరెన్స్లో పాలసీపై కొంత డబ్బు కడితే బోనస్ వస్తుందని నమ్మించింది. అందుకు తొలుత రూ.8,234 డిపాజిట్ చేయాలని చెప్పింది. అకౌంట్ వివరాలు కూడా ఇచ్చింది. దాంతో పాటు ఆధార్ కార్డు, బ్యాంక్ చెక్కు, పాన్ కార్డు, ఫోటో పంపాలని కోరింది. ఆమె చెప్పినట్టే బాధితుడు వివరాలు అన్నీ పంపాడు.
ఆ తర్వాత మాయమాటలు చెప్పి వివిధ ఫార్మాలిటీల పేరుతో మెల్లిగా బాధితుడు నుంచి డబ్బులు రాబట్టింది ఆ యువతి. ప్రతిసారి ఎంత మొత్తంలో డిపాజిట్ చేసినా అతడికి బోనస్ మాత్రం రాలేదు. ఈ విధంగా గత ఏడాదిన్నర కాలంలో వివిధ బ్యాంకు ఖాతాల్లో కోటి రూపాయలకు పైగా జమ చేశాడు బాధితుడు. దాని తర్వాత కూడా బోనస్ రాకపోవడంతో మోసపోయానని గ్రహించాడు. ఈ విషయంపై పోలీసులను ఆశ్రయించాడు. రోహిణి సైబర్ సెల్‌ పోలీస్స్టేషన్‌లో ఫిర్యాదు చేయగా కేసు నమోదు చేసి దర్యాప్తు ప్రారంభించారు పోలీసులు.
'ఏ బీమా కంపెనీ అలా కాల్ చేయదు' బోనస్ లేదా బీమా పునరుద్ధరణ పేరుతో ఇటీవల పెద్ద సంఖ్యలో ముఠాలు మోసం చేస్తున్నాయని సైబర్ నిపుణులు మోహిత్ యాదవ్ తెలిపారు. ఏ బీమా కంపెనీ కూడా తన కస్టమర్లకు కాల్ చేయదని ఆయన చెప్పారు. ఒకవేళ అలా ఎవరైనా కాల్ చేస్తే బ్యాంక్ లేదా ఇన్సూరెన్స్ ఆఫీస్‌కి వెళ్లి విచారణ చేయమని పేర్కొన్నారు. కాల్‌లో పేర్కొన్న ఏ బ్యాంకు ఖాతాలోనూ డబ్బు జమ చేయవద్దని సూచించారు. మోసపోయినట్లు అనుమానమొస్తే.. www.cybercrime.gov.in వెబ్సైట్, మెయిల్ లేదా హెల్ప్‌లైన్ నంబర్ 155260 ద్వారా సంప్రదించి ఫిర్యాదు చేయవచ్చని తెలిపారు.
ఇవీ చదవండి: నీట్ పరీక్షలో 'అక్రమాలు'.. రంగంలోకి సీబీఐ.. 8 మంది అరెస్ట్
జీన్స్ వేసుకోవద్దన్న భర్తను చంపిన యువతి.. భార్యను అలా అన్నారని ముగ్గురి హత్య
