వేరే మహిళతో వివాహేతర సంబంధం పెట్టుకున్న కన్నతండ్రి.. తమ పేరిట ఉన్న ఆస్తిని ఆమెకు కట్టపెడతాడేమోనన్న భయంతో ఏకంగా అతడినే హత్య చేయించింది ఓ కుమార్తె. మహారాష్ట్ర నాగ్పుర్ జిల్లాలోని భివాపుర్ ప్రాంతంలో ఆరు రోజుల కిందట ఓ పెట్రోల్ బంక్ యజమాని దిలీప్ సొంటక్కే కొందరు దుండగలు చేతుల్లో హత్యకు గురయ్యారు. ముందుగా ఈ కేసులో అనుమానితులుగా భావించిన ముగ్గురు నిందితులను అరెస్ట్ చేసిన పోలీసులు.. వారిని విచారించగా షాకింగ్ నిజాలు వెలుగు చూశాయి. కన్నకూతురే పథకం ప్రకారం సుపారీ గ్యాంగ్తో తన తండ్రిని హత్య చేయించినట్లుగా పోలీసులు తేల్చారు.
పోలీసులు తెలిపిన వివరాల ప్రకారం..
నాగ్పుర్ జిల్లాకు చెందిన మృతుడు దిలీప్ సొంటక్కే(60) పెట్రోల్ బంక్ నిర్వహణతో పాటు రియల్ ఎస్టేట్ వ్యాపారం చేసేవాడు. నాగ్పుర్కు 60 కిలోమీటర్ల దూరంలో ఉన్న భివాపుర్‌లో దిలీప్నకు పెట్రోల్ బంక్ వ్యాపారం ఉంది. అతడికి భార్య, 35 ఏళ్ల ప్రియ అనే కుమార్తె ఉన్నారు. అయితే తండ్రి దిలీప్ ఉమ్రేడ్‌ ప్రాంతానికి చెందిన ఓ మహిళతో వివాహేతర సంబంధాన్ని పెట్టుకున్నాడు. అంతేకాకుండా వీరిద్దరూ కలిసి ఓ ప్లాట్లో నివాసం ఉండేవారు. ఈ విషయం కాస్త భార్య, కుమార్తెకు తెలియడం వల్ల ఇంట్లో తరచూ గొడవలు జరిగేవి. పలుమార్లు తల్లీకూతుళ్ల పేరు మీద ఉన్న పొలం, ఇళ్లు సహా మరికొన్ని ఆస్తులను దిలీప్ తన పేరిట బదిలీ చేయాలని భార్యపై ఒత్తిడి తెచ్చేవాడు.
ఈ క్రమంలో తమ పేరిట ఉన్న ఆస్తిని భవిష్యత్లో తండ్రి.. వివాహేతర సంబంధం పెట్టుకున్న మహిళకు రాసిస్తాడేమోనన్న భయం కుమార్తెను వెంటాడింది. ఎలాగైనా తండ్రిని చంపించి ఆ మహిళకు ఆస్తి దక్కనివ్వకుండా చేయాలని పథకం వేసింది. అందుకోసం రూ.5 లక్షలతో ఓ సుపారీ గ్యాంగ్తో తండ్రిని చంపేందుకు ఒప్పందం కుదుర్చుకుంది. అనుకున్నట్లుగానే ఈ నెల 17న తండ్రి బంక్ కార్యాలయంలోని క్యాబిన్లో కూర్చొని ఉండగా అకస్మాత్తుగా ముగ్గురు దుండగులు వచ్చి దిలీప్పై పదునైన ఆయుధాలతో దాడికి దిగి దారుణంగా హత్య చేసి చంపేశారు.
దీంతో దిలీప్ అక్కడికక్కడే ప్రాణాలు విడిచాడు. తనపై అనుమానం రాకుండా ఉండేందుకు మరో ప్లాన్ వేసింది ప్రియ. హత్య చేసింది బయటవాళ్లే అని నమ్మించేందుకు తండ్రిని చంపిన అనంతరం క్యాష్ కౌంటర్లో ఉన్న నగదును తీసుకెళ్లాల్సిందిగా హంతకులకు చెప్పింది. దీని ప్రకారమే నిందితులు కూడా క్యాష్ కౌంటర్ నుంచి డబ్బు తీసుకొని పరారయ్యారు. ఈ దృశ్యాలన్నీ అక్కడే ఉన్న సీసీటీవీ కెమారాల్లో రికార్డ్య్యాయి. వీటి ఆధారంగా నిందితులను పట్టుకున్న పోలీసులు తమదైన శైలిలో విచారణ జరపగా తండ్రిని హత్య చేయమని ప్రేరేపించింది కన్నకూతురే అని తేలింది. దీంతో ఈ కేసులో ప్రధాన నిందితురాలిగా ఉన్న ప్రియను పోలీసులు అరెస్ట్ చేసి విచారించగా నేరాన్ని అంగీకరించింది. ఈ ఘటనకు సంబంధించి మరింత లోతుగా విచారణ జరుపుతామని చెప్పారు పోలీసులు.
