క్రూయిజ్ నౌక డ్రగ్స్ కేసు(cruise ship drugs case) మహారాష్ట్ర రాజకీయాల్లో అగ్గి రాజేసింది. సూపర్ స్టార్ షారుక్ ఖాన్ కుమారుడు ఆర్యన్ ఖాన్ అరెస్టయిన దగ్గరి నుంచి ఆ రాష్ట్ర మంత్రి నవాబ్ మాలిక్ సంచలన విషయాలు వెల్లడిస్తున్నారు. మాజీ ముఖ్యమంత్రి దేవేంద్ర ఫడణవీస్ను(Nawab Malik on Fadnavis) ఇందులోకి లాగారు. దాంతో ఇరువురి మధ్య మాటల యుద్ధం మొదలైంది. డ్రగ్స్ సరఫరాదారుతో ఫడణవీస్ దిగిన ఫొటోను ట్వీట్ చేయగా.. దానిని తిప్పికొడుతూ.. అండర్వల్డ్తో మాలిక్కు సంబంధాలు ఉన్నాయని మాజీ సీఎం ఆరోపించారు. తాజాగా మరోమారు ఫడణవీస్పై తీవ్ర ఆరోపణలు చేశారు నవాబ్ మాలిక్.
ముంబయిలో ఏర్పాటు చేసిన విలేకరుల సమావేశంలో మాట్లాడుతూ(Nawab Malik on Fadnavis).. ఎన్సీబీ జోనల్ డైరెక్టర్ సమీర్ వాంఖడేను కాపాడేందుకు ఫడణవీస్ ప్రయత్నిస్తున్నారని, నేర రాజకీయాలకు ఆయనదే బాధ్యతని ఆరోపించారు.
" తప్పుడు కేసుల్లో అమాయకులను ఇరికిస్తోన్న వ్యక్తితో నేను పోరాడుతున్నా. నేను లేవనెత్తిన అంశాన్ని దేవేంద్ర ఫడణవీస్ పక్కదోవ పట్టించటమే కాక ఒక అధికారిని(సమీర్ వాంఖడే) రక్షించాలని ప్రయత్నిస్తున్నారు. ఆయన పదవీకాలంలో రియాజ్ భటి, మున్నా యాదవ్ వంటి క్రిమినల్స్, గూండాలను తయారు చేశారు. నాగ్పుర్కు చెందిన మున్నా యాదవ్ను నిర్మాణ రంగ కార్మికుల బోర్డుకు ఛైర్మన్గా ఫడణవీస్ నియమించారు. బంగ్లాదేశీయులను అక్రమంగా దేశంలోకి చేరేవేసిన హైదర్ అజామ్ను మౌలానా ఆజాద్ ఫైనాన్స్ కార్పొరేషన్కు ఛైర్మన్ను చేశారు. దావూద్ ఇబ్రహీం సన్నిహితుడు రియాజ్ భటి.. నకిలీ పాస్పోర్టుతో ముంబయి విమానాశ్రయంలో అరెస్ట్ అయ్యాడు. రియాజ్ భటి ఎవరు అనేది ఫడణవీస్ చెప్పాలి? అతనికి అండర్వరల్డ్ డాన్ దావూద్ ఇబ్రహీంతో సంబంధాలు ఉన్నాయని అందరికీ తెలుసు. భటి మీతో, భాజపా కార్యక్రమాల్లో ఎందుకు ఉన్నాడు? ప్రధాని మోదీ హాజరైన కార్యక్రమాల్లోనూ కనిపించాడు. అలాంటి వ్యక్తి ప్రధాని కార్యక్రమం వరకు ఎలా చేరుకోగలిగాడు?"
- నవాబ్ మాలిక్, మహారాష్ట్ర మంత్రి.
నకిలీ కరెన్సీ రాకెట్..
అండర్వరల్డ్కు చెందిన వారికి దేవేంద్ర ఫడణవీస్ పాస్పోర్టులు ఇచ్చారని ఆరోపించారు మాలిక్(Nawab Malik on Fadnavis). నోట్ల రద్దు సమయంలో దేశవ్యాప్తంగా రూ.2వేలు, రూ.5వందల నకిలీ నోట్ల పట్టివేత కేసులు నమోదైతే.. మహారాష్ట్రలో ఒక్క కేసు కూడా రాలేదని, అందుకు ఫడణవీస్ నేతృత్వంలోనే నకిలీ కరెన్సీ రాకెట్ జరగటమే కారణమన్నారు. 2017, అక్టోబర్ 8న బంద్రా కుర్లా కాంప్లెక్స్లో డీఆర్ఐ రైడ్ చేసి రూ.14.56 కోట్లు స్వాధీనం చేసుకుంటే, కేవలం రూ.8.80 లక్షలు చూపించారన్నారు. ఆ దర్యాప్తులో సమీర్ వాంఖడే సైతం ఉన్నారని గుర్తు చేశారు. భాజపా హయాంలో.. వాంఖడే, ఫడణవీస్ మధ్య స్నేహం కారణంగానే ముంబయిలో క్రిమినల్ చర్యలు పెరిగిపోయాయని ఆరోపించారు. క్రూయీజ్ నౌక డ్రగ్స్ కేసులో(cruise ship drugs case) అరెస్టయిన ఆర్యన్ ఖాన్ విడుదలకు రూ.25 కోట్లు డిమాండ్ చేశారని, ఆ తర్వాత రూ.18 కోట్లకు బేరం కుదుర్చుకున్నారని, అయితే.. ఆ పార్టీకి ఆర్యన్ ఖాన్ను ఎందుకు ఆహ్వానించారు? అని ప్రశ్నించారు.
ఫడణవీస్ ట్వీట్.
నవాబ్ మాలిక్ ఆరోపణల నేపథ్యంలో ట్విట్టర్ వేదికగా పరోక్షంగా స్పందించారు దేవేంద్ర ఫడణవీస్. ' పందితో ఎప్పుడూ కుస్తీ పడొద్దు.. దాని వల్ల మీరే మురికిగా మారుతారు, అంతే కాక దానినే ఆ పంది ఇష్టపడుతుంది అనే విషయాన్ని చాలా రోజుల క్రితం తెలుసుకున్నా' అనే వ్యాఖ్యను జోడించారు.
ఇదీ చూడండి: 'ఫడణవీస్కు సంబంధించి హైడ్రోజన్ బాంబు లాంటి వార్త చెప్తా'
