బీఎస్-4 డీజిల్ వాహనాలకు సంబంధించి సుప్రీం కోర్టు కీలక తీర్పు వెలువరించింది. అత్యవసర సేవలకు వినియోగించేందుకు ఏప్రిల్ 1కి ముందు కొనుగోలు చేసిన వాహనాల రిజిస్ట్రేషన్లకు అనుమతినిచ్చింది. దిల్లీ పోలీసులు, మున్సిపల్ కార్పొరేషన్లు అత్యవసర సేవల కోసం ఈ వాహనాలను వినియోగించవచ్చని స్పష్టం చేసింది.
ప్రధాన న్యాయమూర్తి జస్టిస్ ఎస్ఏ బోబ్డే నేతృత్వంలోని ధర్మాసనం పలు కీలక సూచనలు చేసింది. ఏప్రిల్ 1కి ముందు కొనుగోలు చేసిన బీస్-4 వాహనాలు, ఆ తర్వాత కొనుగోలు చేసిన బీఎస్-6 వాహనాల రిజిస్ట్రేషన్లు వాటి నిబంధనలకు అనుగుణంగా ఉండాలని స్పష్టం చేసింది. అన్ని నియమ నిబంధనలకు అనుగుణంగా ఉన్న సీఎన్జీ వాహనాల నమోదుకూ అత్యున్నత న్యాయస్థానం సమ్మతి తెలిపింది.
సుప్రీంను ఆశ్రయించిన ఫాడా..
బీఎస్-4 వాహనాల అమ్మకాలు, రిజిస్ట్రేషన్లకు ఒక నెల గడువు పెంచాలని.. మార్చిలో సుప్రీం కోర్టును ఆశ్రయించింది ఆటో మొబైల్ డీలర్ల సమాఖ్య(ఫాడా). కరోనా సంక్షోభం కారణంగా అమ్మకాలు నిలిచిపోయి.. నష్టపోయామని సుప్రీంకు వివరించింది. కరోనా లాక్డౌన్ అనంతరం దేశ రాజధాని ప్రాంతం మినహా మిగిలిన చోట్ల 10 రోజుల పాటు బీఎస్-4 వాహనాలను విక్రయించడానికి అనుమతిస్తూ సుప్రీంకోర్టు నిర్ణయం తీసుకుంది. తాజాగా ఆ వాహనాల రిజిస్ట్రేషన్కు అనుమతిచ్చింది.
ఈ ఏడాది ఏప్రిల్ 1 నుంచి బీఎస్-6 వాహనాలనే విక్రయించాలని సుప్రీంకోర్టు గతంలోనే ఆదేశించింది. బీఎస్-4 వాహనాలు నుంచి వెలువడే ఉద్గారాలను నియంత్రించడానికి దేశవ్యాప్తంగా 2017 ఏప్రిల్ నుంచి వీటిని నిషేధించింది.
ఇదీ చూడండి: బీఎస్4 వాహనాల అమ్మకానికి గడువు పెంపు
