బంపర్ ఆఫర్: ఓనం లాటరీలో రూ.12 కోట్లు

కేరళ ఇడుక్కికి చెందిన అనంతు అనే యువకుడ్ని ఈ ఏడాది ఓనం లాటరీ వరించింది. ఏటా ఓనం సందర్భంగా నిర్వహించే లాటరీలో తన అదృష్టాన్ని పరీక్షించుకున్న అనంతుకు.. రూ.12 కోట్లు సొంతమయ్యాయి. ఈ సొమ్ముతో మంచి ఇల్లు కట్టుకొని, తమ పిల్లలకు ఉన్నత చదువులు చెప్పిస్తాం అంటున్నారు అతని తల్లిదండ్రులు.

కేరళలో ఈ ఏడాది ఓనం లాటరీని ఇడుక్కికి చెందిన అనంతు దక్కించుకున్నాడు. ఓ ఆలయంలో పనిచేస్తున్న అతను ఈ లాటరీ ద్వారా రూ.12 కోట్లు గెలుచుకున్నాడు.

ఎంబీఏ మానేసి ఆలయంలో చేరి..

అనంతు కుటుంబం వాలియాతోవాలలో ఓ శిథిలావస్థకు చేరిన ఇంట్లో నివాసముంటోంది. చిన్నపాటి వర్షం పడితే చాలు.. కారే ఇల్లు అది. ఇలాంటి కుటుంబ నేపథ్యం నుంచి వచ్చిన అనంతు.. కుటుంబ ఆర్థిక పరిస్థితుల దృష్ట్యా తన ఎంబీఏ కలలను విరమించుకున్నాడు. ఎర్నాకుళంలోని ఓ ఆలయంలో పనిచేస్తున్నాడు. అతని తండ్రి పెయింటర్​ కాగా.. తల్లి ఓ ప్రైవేటు వస్త్ర దుకాణంలో పనిచేస్తున్నారు. ఇలా చాలీచాలని జీతాలతో కుటుంబాన్ని పోషిస్తూ.. తమ పిల్లల్ని చదివించారు.

సాకారమవ్వనున్న కల

ఇలాంటి దీన పరిస్థితుల్లో తమ కుమారుడికి లాటరీ తగలడం పట్ల సంతోషం వ్యక్తం చేసింది ఆ కుటుంబం. లాటరీ సొమ్ముతో తమ కలలు నిజం చేసుకుంటామని అంటున్నారు. అన్ని వసతులతో ఓ ఇల్లు నిర్మించుకోవాలని భావిస్తున్నట్టు తెలిపారు. తమ పిల్లలను ఉన్నత చదువులు చదివించి మంచి భవిష్యత్​ అందిస్తామంటున్నారు.

ఇదీ చదవండి: రాత్రి వేళ విజయవంతంగా పృథ్వీ-2 పరీక్ష