చైనాతో సరిహద్దు వివాదంపై కాంగ్రెస్ నేత రాహుల్ గాంధీ చేస్తున్న విమర్శలను తిప్పికొట్టారు హోంమంత్రి అమిత్షా. రాహుల్ అపరిపక్వ రాజకీయాలు చేస్తున్నారని వ్యాఖ్యానించారు. ఆయన చేస్తున్న విమర్శలకు పాకిస్థాన్, చైనాల్లో స్వాగతం లభించడంలో ఆంతర్యం ఏమిటని ప్రశ్నించారు. 1962 యుద్ధం నాటి నుంచి ఇప్పటివరకు జరిగిన ఘటనలపై పార్లమెంట్ వేదికగా చర్చకు సిద్ధమా అని ప్రశ్నించారు అమిత్షా. ఏఎన్ఐ వార్తాసంస్థకు ఇచ్చిన ఇంటర్వ్యూలో రాహుల్ సహా విపక్షాల విమర్శలపై సమాధానమిచ్చారు షా.
రాహుల్ 'సరెండర్ మోదీ' హ్యాష్ట్యాగ్తో పోస్ట్ చేసే అంశాలకు చైనా, పాక్లో ప్రోత్సాహం లభించడంపై కాంగ్రెస్ నేతలు ఆత్మపరిశీలన చేసుకోవాలని చెప్పారు అమిత్ షా. ఓ పెద్ద రాజకీయ పార్టీ మాజీ అధ్యక్షుడైన రాహుల్ సంక్షోభ సమయంలో అపరిపక్వ విమర్శలు చేయడం సరికాదన్నారు.
"మేం భారత్ వ్యతిరేక వ్యాఖ్యలను సమర్థంగా ఎదుర్కోగలం. అయితే సంక్షోభ సమయంలో ఓ పార్టీ మాజీ అధ్యక్షుడు ఇలా అపరిపక్వ రాజకీయాలు చేయడం సరికాదు. ఆయన 'సరెండర్ మోదీ' హ్యాష్ట్యాక్ పోస్టులపై పాక్, చైనాల్లో లభిస్తున్న ప్రోత్సాహంపై కాంగ్రెస్ నేతలు.. ఆ పార్టీ అత్మపరిశీలన చేసుకోవాలి."
-అమిత్షా, హోంమంత్రి
'ఇప్పుడే చెప్పలేం..'
ప్రస్తుతం చైనా సేనలు భారత భూభాగంలో ఉన్నాయా అనే ప్రశ్నకు సమాధానం దాటవేశారు షా. వాస్తవాధీన రేఖ వద్ద పరిస్థితులను ఇప్పుడే వ్యాఖ్యానించడం సరికాదన్నారు.
'పార్లమెంట్లో చర్చకు సిద్ధమా..'
పొరుగుదేశాలతో వ్యవహారాలపై చర్చకు సిద్ధమేనా అని కాంగ్రెస్కు సవాలు విసిరారు అమిత్షా. 1962 నుంచి ఇప్పటివరకు ప్రతి అంశాన్ని చర్చిద్దామన్నారు. జవాన్లు ఘర్షణను ఎదుర్కొంటున్న వేళ.. పాక్, చైనాలను సంతోషపెట్టే వ్యాఖ్యలను రాహుల్ చేయకుండా ఉండాల్సిందన్నారు.
'మీ పార్టీలో ప్రజాస్వామ్యమా?'
భాజపాలో ప్రజాస్వామ్యం లేదన్న కాంగ్రెస్ విమర్శలకు సమాధానమిచ్చారు షా. 'భాజపాలో అధ్యక్షుడిగా అడ్వాణీ అనంతరం రాజ్నాథ్ సింగ్, నితిన్ గడ్కరీ, నేను, జేపీ నడ్డా ప్రజాస్వామ్యయుతంగా ఎన్నికవుతూ వస్తున్నాం. గాంధీ కుటుంబయేతరులు కాంగ్రెస్కు నేతృత్వం వహించగలరా' అని ప్రశ్నించారు.
ఇవీ చూడండి: ఆ రెండు యుద్ధాల్లో భారత్దే గెలుపు.. కానీ..: షా
