ఇద్దరు ఖలిస్థాన్ ఉగ్రవాదులను పంజాబ్ పోలీసులు అరెస్టు చేశారు. పాకిస్థాన్కు చెందిన ఉగ్రసంస్థలతో సంబంధాలు కొనసాగిస్తున్న వీరు... రాష్ట్రంలో వరుస దాడులు, హత్యలకు కుట్ర పన్నినట్లు పోలీసులు తెలిపారు.
ఖలిస్థాన్ ఉగ్రవాదులు గుర్మీత్ సింగ్, విక్రమ్ సింగ్ను గురువారం రాత్రి జండియాలా పోలీస్స్టేషన్ పరిధిలోని గురుదాస్పురియా దాబా సమీపంలో అరెస్టు చేసినట్లు పోలీసులు తెలిపారు. వారి వద్ద నుంచి ఎంపీ 5 సబ్ మెషీన్గన్, నాలుగు మ్యాగజైన్లతో కూడిన 9 ఎంఎం పిస్టళ్లు, రెండు మొబైల్ ఫోన్లు స్వాధీనం చేసుకున్నట్లు వెల్లడించారు.
"మొబైల్ ఫోన్లలో ఉగ్రదాడులకు సంబంధించిన కీలక ఆధారాలు ఉన్నాయి. ముఖ్యంగా చిత్రాలు, వాయిస్ మెసేజ్లతో పాటు ఓ ప్రత్యేక ప్రాంతం జియో-లొకేషన్ డేటా కూడా ఉంది. పాక్ ఉగ్రసంస్థలతో చేసిన అనుమానాస్పద లావాదేవీల వివరాలు కూడా అందులో ఉన్నాయి."
- పంజాబ్ పోలీసులు
ఐఎస్ఐతో కలిసి కుట్ర
44 ఏళ్ల గుర్మీత్ సింగ్ అమృత్సర్ సుల్తాన్విండ్ రోడ్లోని గండా సింగ్ కాలనీకి చెందినవాడు. ఇతని వద్ద దొరికిన మొబైల్ ఫోన్లోని సమాచారం ఆధారంగా.. ఇతనికి పాకిస్థాన్ నిఘా సంస్థ ఐఎస్ఐతో పాటు, భారత్ వ్యతిరేకంగా పనిచేస్తున్న ఓ ఉగ్రవాద సంస్థతో సంబంధాలు కలిగి ఉన్నట్లు పోలీసులు గుర్తించారు.
"సుమారు 3 ఏళ్ల క్రితం పాకిస్థానీ ఉగ్రసంస్థలను కలుసుకున్నాను. వారు పంజాబ్లో ఉగ్రదాడులు చేయాలని, ప్రత్యేకించి కొంత మంది నిర్దిష్ట వర్గానికి చెందిన వ్యక్తులను లక్ష్యంగా చేసుకుని దాడులు చేయాలని మాకు చెప్పారు."
- గుర్మీత్ సింగ్, ఖలిస్థాన్ ఉగ్రవాది
ఈ కేసును చాలా తీవ్రంగా తీసుకున్న పోలీసులు.. ఖలిస్థాన్ కుట్రలపై పూర్తి స్థాయిలో దర్యాప్తు చేపడుతున్నట్లు వెల్లడించారు.
ఇదీ చూడండి: భారత్-చైనా 'శాంతి' చర్చలు ఇక ముగిసినట్టేనా?
