పార్లమెంటరీ వర్షాకాల సమావేశాల్లో విపక్షాలు వ్యవహరించిన తీరును ఎండగట్టారు కేంద్ర మంత్రి ప్రకాశ్ జావడేకర్. ఎటువంటి లక్ష్యం లేకుండా పార్లమెంటును బహిష్కరించిన విపక్షాలు... నిరసనలు, ధర్నాలు చేశాయని మండిపడ్డారు. విపక్షాలు నీతిలేని రాజకీయాలు చేస్తున్నాయని విమర్శించారు. విప్లవాత్మకమైన బిల్లులపై చర్చ జరుగుతున్నప్పుడు సభాధ్యక్షుడి మాట వినకుండా సభలో గందరగోళం సృష్టించారన్నారు జావడేకర్.
"పార్లమెంటులో ఎలాంటి సమస్యల మీదైనా చర్చించి, తమ అభిప్రాయలను తెలిపే హక్కు ప్రతిపక్షాలకు ఉంది. కానీ దానికి బదులు పార్లమెంటు సమావేశాలను బహిష్కరించి, ధర్నాకు దిగారు. రాజ్యసభను అవమానించారు. బిల్లులను ఆమోందించవద్దని రాష్ట్రపతికి విజ్ఞప్తి చేస్తున్నారు."
- ప్రకాశ్ జావడేకర్, కేంద్రమంత్రి
విపక్షాలు... రాష్ట్రపతిని కలవడానికి ఏడాదిలో 300 రోజులు ఉన్నాయి. కేవలం 70- 80 రోజులు జరిగే పార్లమెంట్ సమావేశాల్లో ఎవరు ఏ అంశంపై మట్లాడినా.. తాము అవరోధం కల్పించలేదన్నారు కేంద్రమంత్రి. కీలక సమయంలో డిప్యూటీ ఛైర్మన్ ఎంత చెప్పిన వినిపించుకోకుండా సభలో రభస సృష్టించారని ప్రతిపక్షాలను ఎండగట్టారు. ప్రతిపక్షాలు... సమావేశాలను బహిష్కరించకుండా ఉండాల్సిందన్నారు.
కొత్త వ్యవసాయ బిల్లులు రైతులకు వరం లాంటివని అభివర్ణించారు జావడేకర్. రబీ పంటలకు ప్రభుత్వం ఎంఎస్పీలను పెంచిందని.. వాటిని సేకరిస్తుందన్నారు. రైతులు తమ పంటను అధిక ధరకు అమ్ముకొనే అవకాశం కల్పిస్తుందన్నారు.
ఇదీ చూడండి: ట్రాఫిక్ ఉల్లంఘనులకు వారంలోనే రూ.21 కోట్ల జరిమానా
