వచ్చే ఏడాది జనవరి 1 నాటికి అయోధ్య రామమందిరం నిర్మాణం పూర్తవుతుందని కేంద్ర హోంశాఖ మంత్రి అమిత్‌షా గురువారం వెల్లడించారు. త్వరలో ఎన్నికలు జరగనున్న త్రిపురలోని ఓ రథయాత్రలో అమిత్‌షా పాల్గొన్నారు.''రాహుల్‌ బాబా! సబ్రూమ్‌ నుంచి చెబుతున్నా విను.. అయోధ్య రామమందిరం జనవరి 01, 2024 నాటికి పూర్తవుతుంది'' అని ఘాటుగా అన్నారు. కాంగ్రెస్, కమ్యూనిస్టు పార్టీలే రామ మందిర సమస్యను ఏళ్ల తరబడి కోర్టులో మగ్గిపోయేలా చేశాయని ఆరోపించారు. కానీ సుప్రీం కోర్టు తీర్పు వచ్చిన వెంటనే నరేంద్ర మోదీ రామ మందిరానికి భూమి పూజ చేశారన్నారు. రామమందిరం అంశాన్ని 1990లో తమ అగ్ర నేత ఎల్కే అడ్వాణీ రథయాత్ర చేపట్టిన నుంచి లేవనెత్తుతోంది భాజపా. ఇప్పుడు కూడా మరోసారి ఆ అంశాన్ని తెరపైకి చెచ్చి 2024లో జరగనున్న సాధారణ ఎన్నికల్లో అస్త్రంగా ప్రయోగించనున్నట్లు తెలుస్తోంది.
అమిత్ షా చేసిన వ్యాఖ్యలకు కాంగ్రెస్ సీనియర్ లీడర్ అధిర్ రంజన్ చౌదరి స్పందించారు. దేశంలో ఉన్న సమస్యల గురించి ఆలోచించకుండా.. 2024 ఎన్నికలకు నినాదాలను ప్రకటిస్తున్నారని మండిపడ్డారు. త్రిపురలో కాంగ్రెస్, కమ్యూనిస్టులతో పాటు త్రిణమూల్ కాంగ్రెస్ కూడా తన అదృష్టాన్ని పరీక్షించుకుంటోంది. తాజాగా షా వ్యాఖ్యలపై స్పందించిన ఆ పార్టీ.. పొలిటికల్ మైలేజ్ కోసం వాడుకోవడం సరైందని కాదని ఆరోపించింది.
రథయాత్రతో పుంజుకున్న భాజపా..
1990లలో ఎల్కే అడ్వాణీ చేపట్టిన రథయాత్ర భాజపా బలం పంజుకోవడానికి పునాదులు వేసింది. ఆ యాత్రలో భాగంగాన్ 16వ శతాబ్దంలో కట్టిన మసీదు శ్రీరాముడు జన్మించిన ప్రాంతమని, దాన్ని కూల్చేయాలని భాజపా శ్రేణులు పిలుపునిచ్చాయి. దీంతో డిసెంబర్ 1992లో కాషాయ దళాలు బాబ్రీ మసీదును కూల్చేశాయి. దశబ్దాల తర్వాత 9 నవంబర్ 2019న రామ మందిర నిర్మాణానికి అనుకూలంగా సూప్రీం కోర్టు ఈ కేసులో తుది తీర్పు వెల్లడించింది. అనంతరం 5 ఆగస్టు 2020లో ప్రధాని నరేంద్ర మోదీ అయోద్య రామ మందిరానికి భూమి పూజ చేశారు.
