గుజరాత్లో రూ.50 లక్షలు లంచం తీసుకుంటూ అవినీతి నిరోధక శాఖ(ఏసీబీ) అధికారులకు పట్టుబడ్డాడు ప్రకాశ్ సిన్హ్ రౌల్ అనే ఏఎస్ఐ. కంభట్ ఎరువుల కుంభకోణంలో బాధితుని పేరు ఎఫ్ఐఆర్లో నమోదు చేయకుండా ఉండడానికి బదులుగా ఈ మేరకు లంచం తీసుకున్నాడని అధికారులు వెల్లడించారు.
కంభట్ ఎరువుల కుంభకోణం..
ప్రభుత్వం సబ్సిడీగా ఇచ్చే యూరియాను ఆనంద్ నగరం, కంభట్ ప్రాంత పారిశ్రామిక వాడలోని గోదాముల్లో దుండగులు అక్రమంగా నిల్వచేస్తున్నారు. అటు నుంచి ప్రైవేట్ మార్కెట్లో అమ్ముతున్నారు. ఈ విషయం తెలుసుకున్న ప్రకాశ్ సిన్హ్.. గోదాముల్లో తనిఖీలు చేశారు. 1060 యూరియా బస్తాలను, నాట్లు వేసే యంత్రాన్ని స్వాధీనం చేసుకున్నారు. ప్రాథమిక దర్యాప్తులో గోడౌన్ యజమాని పేరు నమోదు చేయలేదు. ఎఫ్ఐఆర్లో పేరు నమోదు చేయకుండా ఉండడానికి బదులుగా రూ.50 లక్షలను డిమాండ్ చేశాడు.
మాటువేసి మరి..
గురువారం రాత్రి ఓ రెస్టారెంట్లో గోడౌన్ యజమాని నుంచి లంచం తీసుకోవడానికి ప్రణాళిక వేసుకున్నాడు ఏఎస్ఐ. డబ్బులు ఇవ్వడం ఇష్టం లేని ఆ యజమాని.. ఏసీబీకి విషయాన్ని తెలియజేశాడు. ముందే అక్కడ కాపుగాసిన ఏసీబీ అధికారులు..సదరు ఏఎస్ఐ లంచం తీసుకుంటుండగా రెడ్ హ్యాండెడ్గా పట్టుకున్నారు. నేరాన్ని నిందితుడు అంగీకరించాడు.
ప్రకాశ్పై కేసు నమోదు చేసిన ఏసీబీ అధికారులు..దర్యాప్తును కొనసాగిస్తున్నారు. పెద్ద మొత్తంలో అక్రమాస్తులు బయటపడే అవకాశం ఉందని అనుమానిస్తున్నారు.
ఇదీ చదవండి:చట్టం సద్వినియోగం అయ్యేదెలా?
