ఉత్తర్ప్రదేశ్ ఎటా జిల్లాలో అరుదైన సంఘటన జరిగింది. ఓ తోపుడు బండిపై బట్టలు అమ్ముకునే వ్యక్తికి ఇద్దరు బాడీగార్డ్స్ ఉన్నారు. వ్యాపారి రామేశ్వర్ బట్టలు అమ్ముతుండగా.. ఇద్దరు బాడీగార్డ్స్ ఏకే 47 తుపాకులతో ఆయనకు రక్షణ కల్పిస్తున్నారు. దీంతో బట్టలు కొనడానికి వచ్చిన వినియోగదారులు.. రామేశ్వర్ బాడీగార్డ్స్ను చూసి ఆశ్చర్యపోతున్నారు.
ఎటా జిల్లాకు చెందిన రామేశ్వర్ దయాల్ తోపుడు బండిపై బట్టల వ్యాపారం చేస్తూ జీవనం సాగిస్తున్నారు. తన భూమికి పట్టా ఇప్పించాలంటూ ఎస్పీ నేత, మాజీ ఎమ్మెల్యే రామేశ్వర్ సింగ్ సోదరుడు జుగేంద్ర సింగ్ను కలిశారు. ఈక్రమంలోనే వీరిద్దరి మధ్య వివాదం తలెత్తింది. దీంతో జుగేంద్ర సింగ్.. తనను కులం పేరుతో దూషించారని పోలీస్ స్టేషన్లో ఫిర్యాదు చేశారు దయాల్. దీనిపై జుగేంద్ర సింగ్ హైకోర్టుకు వెళ్లారు. రామేశ్వర్ చేసిన ఆరోపణలన్నీ తప్పని.. ఈ కేసును కొట్టివేయాలని కోర్టును కోరారు. ఈ క్రమంలోనే రామేశ్వర్ దయాల్ను శనివారం కోర్టులో హాజరు కావాలని ఆదేశించింది. కోర్టుకు వచ్చిన దయాల్ను చూసిన న్యాయమూర్తి.. ఆశ్చర్యానికి గురయ్యారు. ఓ బాధితుడికి ఎందుకు భద్రత కల్పించలేదని పోలీసులను ప్రశ్నించారు. బాధితుడికి ఇద్దరు బాడీగార్డ్స్ను భద్రతగా నియమించాలని ఆదేశించారు.
ఇవీ చదవండి: నీట్ 'లోదుస్తుల' రగడపై ఎన్టీఏ కీలక వ్యాఖ్యలు.. కేంద్రానికి కేరళ లేఖ
విపక్షాల ఉపరాష్ట్రపతి అభ్యర్థిగా 'ఆళ్వా' నామినేషన్.. వెంటవచ్చిన పవార్, రాహుల్
