ప్రేమకు వయసుతో సంబంధం లేదని అంటుంటారు. యువకుల నుంచి వృద్ధుల వరకు ఏ వయసులోనైనా ప్రేమ కలగవచ్చని చెబుతుంటారు. ఇలాగే.. లేటు వయసులోనే ఓ వృద్ధుడికి ప్రేమ పుట్టింది. దీంతో కుటుంబ సభ్యులను ఎదురించి మరి ప్రేమ వివాహాన్ని చేసుకున్నాడు. ఇంతకీ ఈ ప్రేమ వివాహం ఎక్కడ జరిగిందో? వధూవరుల వయసు ఎంతో? వారి పెళ్లికి వచ్చిన అడ్డంకులు ఏంటో ఓ సారి తెలుసుకుందామా మరి.
ఉత్తర్ప్రదేశ్.. భదోహి జిల్లాలోని బీహరోజ్పుర్కు చెందిన రామ్ యాదవ్(60), దాదాపు తన వయసులో సగం వయసు ఉన్న అషర్ఫీ దేవి(28)ని ప్రేమించాడు. అయితే అషర్ఫీ దేవికి 2008లోనే కృష్ణ మూరత్ యాదవ్తో వివాహమైంది. ఆమెకు ఇద్దరు పిల్లలు కూడా ఉన్నారు. కృష్ణ మూరత్.. కుటుంబ పోషణ కోసం తమిళనాడులో పని చేస్తున్నాడు. ఇటీవల అతడు తమిళనాడు నుంచి భదోహికి తిరిగి వచ్చాడు. అప్పటికే అషర్ఫీ దేవి.. రామ్ యాదవ్తో పారిపోయింది. దీంతో తన భార్య కనిపించడం లేదని కృష్ణ మూరత్.. కోయిరౌనా పోలీసులకు ఫిర్యాదు చేశాడు. దీంతో పోలీసులు ముమ్మరంగా గాలించి రామ్ యాదవ్, అషర్ఫీ దేవిని పట్టుకున్నారు. అనంతరం పోలీస్ స్టేషన్కు తీసుకువచ్చారు.
రామ్ యాదవ్, అషర్ఫీ దేవి కుటుంబ సభ్యులను పోలీస్ స్టేషన్కు పిలిపించారు. ఇరు కుటుంబాల మధ్య గొడవ లేకుండా రాజీ కుదిర్చేందుకు ప్రయత్నించారు. తన భర్త కృష్ణతో వెళ్లేందుకు అషర్ఫీ దేవి అంగీకరించలేదు. తన ప్రియుడు రామ్ యాదవ్నే వివాహం చేసుకుంటానని పోలీసుల ఎదుట చెప్పింది. తన భర్తతో వెళ్లనని పోలీసులకు తెలిపింది. రామ్ యాదవ్ కుమారుడు, కోడలు, మనమడు, మనమరాలు వచ్చి అతడిని ఒప్పించే ప్రయత్నం చేశారు. అయినా రామ్ యాదవ్ కూడా వినలేదు. అషర్ఫీ దేవినే వివాహం చేసుకుంటానని.. ఆమె అంటే తనకు ఇష్టమని చెప్పాడు. దీంతో చేసేదేమి లేక ఇరువురి కుటుంబ సభ్యులు అక్కడి నుంచి వెళ్లిపోయారు. దీంతో పోలీస్ స్టేషన్నే తమ వివాహానికి వేదికగా చేసుకున్నారు రామ్ యాదవ్, అషర్ఫీ దేవి. కోయిరౌనా పోలీస్ స్టేషన్లో ఉన్న గుడిలో బుధవారం వారిద్దరూ పెళ్లి చేసుకున్నారు.
రామ్ యాదవ్, అషర్ఫీ దేవీ చాలా కాలంగా ప్రేమించకుంటున్నారని కోయిరౌనా పోలీస్ స్టేషన్ ఇంఛార్జ్ మక్కన్ లాల్ తెలిపారు. రామ్ యాదవ్, అషర్ఫీ దేవీ తమ కుటుంబ సభ్యులు పెళ్లికి అంగీకరించరనే భయంతో ఇంట్లో నుంచి పారిపోయారని ఆయన చెప్పారు. అషర్ఫీ దేవి భర్త కృష్ణ ఫిర్యాదు చేయడం వల్ల గాలింపు చర్యలు చేపట్టామని పేర్కొన్నారు. అషర్ఫీ దేవి, రామ్ యాదవ్ను పట్టుకున్నామని.. అయితే ఆమె తన భర్తతో వెళ్లేందుకు ఇష్టపడలేదని మక్కన్ లాల్ వివరించారు.
