Group-1 Latest Updates : రాష్ట్రంలో ఈనెల 9న నిర్వహించనున్న గ్రూప్-1 ప్రిలిమినరీ పరీక్ష హాల్ టికెట్లలో తెలంగాణ పబ్లిక్ సర్వీస్ కమిషన్ స్వల్ప మార్పులు చేసింది. ఇందులో భాగంగా అభ్యర్థుల కమ్యూనిటీకి సంబంధించిన క్రిమిలేయర్, నాన్ క్రిమిలేయర్, ఈడబ్యూఎస్ వివరాలను పొందుపరిచింది. ఈ మేరకు సవరించిన హాల్ టికెట్లను సోమవారం మధ్యాహ్నం నుంచి అందుబాటులోకి తీసుకొచ్చింది.
హాల్ టికెట్లలో మార్పుల విషయాన్ని అభ్యర్థులకు టీజీపీఎస్సీ ఎస్ఎంఎస్ ద్వారా సమాచారం ఇచ్చింది. పరీక్ష కేంద్రం, ఇతర వివరాల్లో ఎలాంటి మార్పులు ఉండవని తెలిపింది. తొలుత పొందుపరిచిన హాల్ టికెట్లలో కులవివరాలు పేర్కొన్నప్పటికి క్రిమిలేయర్, నాన్ క్రిమిలేయర్ వివరాలు లేవు. ప్రిలిమినరీ హాల్ టికెట్లు తదుపరి మెయిన్స్, ఇంటర్వ్యూల వరకు కీలకమని దీన్ని తుది నియామకాల వరకు భద్రపరచుకోవాలని టీజీపీఎస్సీ స్పష్టం చేసింది.
